АСТАНА, 18 қаңтар — Sputnik. "Арқанкерген" қосынында көп адамды өлтіргені үшін жазасын өтеп жатқан Владислав Челахтың ісін Жоғарғы сот қарайды.
Жоғарғы сот сотталған Челахтың істі қайта қарау туралы өтінішін қанағаттандырғанын растады, деп хабарлайды Sputnik Қазақстан. Өтініш біріккен ұлттар ұйымының адам құқықтарын қорғайтын комитетінің шешімімен байланысты.
Владислав Челахтың ісін қараша айында БҰҰ-ның адам құқықтары жөніндегі комитеті қарады. Ұйымның көмегіне марқұм адвокат Серік Сәрсенов жүгінген еді.
БҰҰ комитетіндегілер Челахтың ісін қарауда халықаралық азаматтық және саяси құқықтар пактісі бұзылды деген шешім шығарды.
Арқанкергендегі қанды қырғын
Қазақстан мен Қытай шекарасындағы "Арқанкерген" қосынындағы елді есеңгіреткен қайғылы оқиға 2012 жылдың мамыр айында болды. Тергеу 19 жастағы Владислав Челах 14 қызметтесі мен егерьді өлтіріп, кейін казарма мен адамдардың мәйітін өртеп жіберді.
Тағы оқыңыз: БҰҰ Челах ісінде адам құқығы бұзылғанын мәлімдеді
Сот Челахты 15 адамның өлімі үшін кінәлі деп тауып, өмір бойына бас бостандығынан айырды. Дәл қазір Челах түрме жаргоны бойынша "Қара бүркіт" деген атауға ие болып жүрген колонияда жазасын өтеп жатыр.