АСТАНА, 5 қазан — Sputnik. Windows операциялық жүйесін жаңарту кезінде компьютердегі файлдар жойыла бастады. Бұл жайында MSPoweruser порталы хабарлады.
Порталдың жазуынша, Windows 10 (1809) жүйесін орнатқан кезде "Менің құжаттарым" бумасындағы файлдар жоғалып кетеді. Техникалық қолдау қызметіне шағымданған қолданушылар бұрынғы жүйеге қайтарып көрсе де, файлдардың қалпына келмегенін айтып отыр.
Бұл жайттың себебі деректерді автоматты түрде көшіруге жауап беретін OneDrive клиентінің жаңа функцияларының бірінің істен шығуы болуы мүмкін екен.
Ал кей қолданушылар жүйелік дискідегі windows.old бумасын ашып, жойылған файлдарды қайта алып шығуға болады дейді.