АТЫРАУ, 19 шілде — Sputnik. Атырау соты былтыр қараша айында дәмханаға келушілердің бірін 52 рет пышақтап өлтірген Қырғызстан азаматын қылмыстық жауапкершіліктен босатты, деп жазады Sputnik "Мой город" порталына сілтеме жасап.
Қылмыс вокзалдағы "Арба" дәмханасында таңертең ерте болған. 1990 жылы туған сотталушы дәмханаға келушілердің бірі – 39 жастағы ер адамға еш себепсіз тап беріп, пышақтай бастайды.
Жас әйел автобуста төрт адамды пышақтап тастады
Дәмхана қызметшілерінің ешқайсысы қанішерді тоқтатуға батылы жетпеген. Қылмыскерді оқиға орнына шақырылған полиция жасағы құрықтады. Жәбірленуші жедел жәрдем келгенше жан тапсырған болатын.
Сотқа дейінгі тергеулер барысында тәртіп сақшылары бірқатар сараптама жүргізген. Дәрігерлер ұсталған ер адам шизофрения дертіне шалдыққан деп қорытынды жасады.
Осыған байланысты облыстық сот айыпталушыны қылмыстық жауапкершіліктен босатып, Алматы облысы Ақтас ауылындағы арнайы республикалық психиатриялық ауруханаға мәжбүрлі ем алуға жөнелтті.