АСТАНА, 12 мамыр – Sputnik. Оңтүстік Қазақстанда "Қазақ елі" фильмінің "Алтын тақ" деп аталатын бөлімі түсіріліп жатыр, деп хабарлады облыстық әкімдік баспасөз қызметі.
Түсірілімді "Қазақфильм" киностудиясы Түлкібас ауданында Иірсу ауылына жақын Тақиятөбе жерінде жүргізіп жатыр, оған 500 адам қатысады.
Фильмнің екінші кезеңі он бөлімнен тұрады. Сценарий авторлары – Смағұл Елубай мен Тимур Жақсылықов.
Алғашқы бес бөлімі Алматы облысы Талғар ауданында басталған. Қазақстанның оңтүстік өңірінде Әбілхайыр хан қолы мен Керей және Жәнібек әскерлерінің шайқасы, Қасымханның оралуы түсірілмек.
Оңтүстік Қазақстанда түсірілім маусым айына дейін жалғасады. Ал кинокартина көрермен назарына биыл желтоқсанда ұсынылады.