АСТАНА, 18 сәуір — Sputnik. Башқұртстандағы Стерлимак қаласында оқушы мұғалімі мен сыныптасын пышақпен жарақаттап, кейін информатика пәні бөлмесін өртеп жіберген.
"Бастапқы деректерге сүйенсек, 17 жастағы оқушы сыныптастары отырған информатика пәні бөлмесіне кіріп, оқушы қыздың қолын пышақпен кескен, кейін мұғалімге де пышақ салыпты. Артынша жанғыш сұйықтықты шашып, сынып бөлмесін өртеген", — деп хабарлайды Ресейдің Тергеу комитеті.
Ведомство мәліметіне сүйенсек, жасөспірім өз-өзіне қол салуға тырысыпты. Оқушы мен пышақ жарақатын алғандар ауруханаға жатқызылды.
Өрт салдарынан ешкім зардап шеккен жоқ. Өрт сигнализациясы іске қосылған кезде, басқа бір сыныптың оқушысы екінші қабаттан секіріп кетіпті.
Оқиға орнында тергеу жұмыстары жүргізілуде.