АСТАНА, 13 сәуір – Sputnik. Жамбыл облысында ауыл тұрғыны мешітке шабуыл жасап, Алла үйінің астан-кестеңін шығарған, терезелерін талқандаған, деп хабарлады 77news.kz ақпарат агенттігі.
Алладан қорықпаған басбұзар киелі кітап құранды шашып, аяққа таптаған. Есік, терезелерін, мешіт мүлкін әбден талқандаған. Алайда ұрлық дерегі байқалмаған.
Бұл – Қордай ауданында сәрсенбі күні болған оқиға. Ал кеше Алла үйін қиратқан қарақшы құрықталды. Мешіттің астан-кестеңін шығарған күнәһар Шу ауданы Жданов ауылының тұрғыны болып шықты. Ол бұзақылық жасаған кезде мас болған көрінеді.
Қазір тергеу амалдары жүргізіліп жатыр. Арақтың арбауына түскен күдіктінің ісі сотта қаралады.