АСТАНА, 11 сәуір — Sputnik. Шығыс Қазақстан облысы Үржар ауданында атқа мінген малшы өзенге батып кетті.
56 жастағы ер адам, болжам бойынша, Қаракөл өзенінің арғы бетіне өтпек болған. Қатты ағыннан астындағы аты құлап, өзімен бірге шопанды да ала кеткен.
"Үстіне қалың киім киген. Киімінің салмағы ауыр болғандықтан, судан шығуына кедергі келтірген. Оның жоғалып кеткен туралы туыстары хабар берді. Бірнеше күн бойы құтқарушылар мен полиция қызметі іздегенімен, ер адамды таба алмапты", — делінген облыстың төтенше жағдайлар жөніндегі департаменті хабарламасында.
Іздеу жұмыстарына Өскемен қаласының сүңгуірлері де араласты. Олар ер адамның денесін құлаған жерінен 1,5 шақырым қашықтықта тауыпты.