АСТАНА, 30 наурыз — Sputnik. Алматыда Өзбекстан азаматтары гипнозды пайдаланып, зейнеткерлерді арбап, тонап кеткен, деп хабарлайды қалалық ішкі істер департаменті баспасөз қызметі.
Полиция мәліметіне сүйенсек, қылмыстық топ мүшелері – 5 Өзбекстан азаматы.
"Бұл азаматтар зейнеткерлерді алдаған. Ақшаны тексеріп, жаңасына айырбастап береміз деп ата-әжелердің тиын-тебенін алып тайып тұрған. Бұл қылмыстық топтың әйелдері гипнозды пайдаланған екен: қариялар бөтен адамға қаражатын қалай беріп қойғанын есіне түсіруге қиналады", — деп мәлімет берді Бостандық ауданы полиция бөлімінің басшысы Тимур Өсекбаев.
Қазір барлық тонаушы анықталып, қамауға алынды. Полиция осы қылмыскерлердің әрекетінен зардап шеккендерді іздеп жатыр.