АСТАНА, 20 наурыз — Sputnik. Үндістанда телефонмен сөйлесіп отырған қыз көз жұмды. Daily Mail басылымының мәліметінше, оның қолындағы смартфон жарылып кеткен, деп жазды life.ru.
18 жастағы Ума Орам өзінің Nokia телефонын қуаттау құрылғысына қосып, отбасы мүшелерінің бірімен әңгімесін жалғастыра берген. Кенет тарс еткен дыбыс шығып, қыз ес-түссіз құлаған.
Жарылыс салдарынан Уманың кеудесін, қолы мен аяғын қатты күйік шалған. Трагедия орнына келген дәрігерлер зардап шегушінің қаза тапқанын анықтады.
Қыздың ағасының айтуынша, жарылған Nokia 5233 телефоны 2010 жылы шыққан екен. Фин компаниясының өкілдері қыздың отбасына көңіл айтты.