АСТАНА, 15 наурыз — Sputnik. Үш жасар өгей қызын тістеп тастаған ер адамның ісі бойынша басты сот талқылауы Қаскелеңде басталды.
Сот тыңдауы Қарасай аудандық соты ғимаратында жабық режимде өтіп жатыр. Алматы облысы кәмелеттік жасқа толмағандар ісі бойынша мамандандырылған №2 ауданаралық сотының судьясы Берік Күзембай отырысқа төрағалық етуде.
Сотталушы – Ринат Қонқабаев ҚР ҚК 106-бабы 2-тармағы 3-ші және 11-тармақшасы бойынша айыпталған.
Естеріңізге сала кетсек, биыл қаңтар айында әлеуметтік желіде 31 жастағы өгей әкесі тістеп тастаған үш жасар қыздың суреттері жарияланған болатын. Суреттерді таратқан әйелдің сөзіне сүйенсек, ер адам өгей қызының мұрнын қыршып тістеп алған. Жәбірленген бала 20 күн бойы дәрігерлердің бақылауында болды.