АСТАНА, 9 қаңтар — Sputnik. Жапондық астронавт Норишиге Канаи Халықаралық ғарыш станциясында болған үш аптада бойының 9 сантиметрге өскенін мәлім етті. Бұл туралы ол Twitter-дегі парақшасында хабарлады, деп жазады РИА Новости.
"Бүгін менің өте маңызды жаңалығым бар. Медициналық тексерістен өткен кезде менің бойымның бірден 9 сантиметрге өскені анықталды. Бұл үш аптаның ішінде болған өзгеріс", — деп жазды ол.
Астронавт мектеп жасынан бері бойы бұлай өспегенін айтады. Енді ол "Союз" кемесінің орындығына сыймай қаламын ба деп алаңдап отыр.
Әдетте ғарышта гравитация болмағандықтан астронавттардың 1-2 сантиметрге өсетіні мәлім.
Жапондық астронавт Норишиге Канаи халықаралық ғарыш станциясына "Союз МС-07" экипажының құрамында былтыр 19 желтоқсанда қонған.