ЖИ, контентті ілгерілету: Sputnik Pro жобасының биылғы соңғы модулі өтті
20:12 16.10.2026 (жаңартылды: 21:11 16.10.2026)
© Sputnik/Стрингер
Жазылу
Қазан айындағы бағдарламаға Қазақстан, Абхазия, Беларусь, Қырғызстан, Тәжікстан, Өзбекстан және Оңтүстік Осетиядан журналистер, блогерлер, SMM және PR мамандары қатысты
АСТАНА, 16 қазан – Sputnik. Мәскеуде 12-16 қазан аралығында "Sputnik Pro на Зубовском" жобасының биылғы соңғы модулі өтті.
Бір апта бойы қатысушылар заманауи медиа трендтеріне арналған дәрістер тыңдап, шеберлік сабақтарына қатысты. Бағдарламада түрлі платформаларда контент жасау және оны ілгерілету, Telegram-да ақпараттық арна жүргізу, сондай-ақ медиамониторинг қағидаттары қамтылды.
Мәскеуде 12-16 қазан аралығында "Sputnik Pro на Зубовском" жобасының биылғы соңғы модулі өтті
© Sputnik/Стрингер
Қазір мұндай бағдарламалардың ешқайсысы нейрондық желілер тақырыбынсыз өтпейді. Жасанды интеллект қатысушылардың ерекше қызығушылығын тудыратын тақырыптардың бірі болып отыр.
Қазақстандық қатысушы Анар Ысқақова
© Sputnik/Стрингер
"Маған фактчекинг пен жасанды интеллект туралы дәрістер өте ұнады. Лекторлардың барлық кеңесін, әсіресе жаңалықтар дайындағанда қолдануға тырысамын. Мысалы, жасанды интеллект арқылы оқырманның назарын аударатын қызықты тақырыптар ойлап табуға болады", – деді Sputnik-ке Қазақстаннан келген қатысушы Анар Ысқақова.
15-модуль аясында медиа саласының түрлі мамандарымен бірнеше кездесу өтті. Атап айтқанда, қатысушылар әскери тілшімен кездесіп, қауіпті аймақтардағы жұмыстың ерекшеліктерімен танысты. Сондай-ақ "Диалог" автономды коммерциялық емес ұйымы мен Халықаралық фактчекинг қауымдастығының шақырылған спикерлері жалған ақпарат таратудағы қазіргі үрдістер туралы айтып берді.
Бағдарламаға ресейлік саясаткер әрі қоғам қайраткері Мария Бутина да қонақ болды. Ол АҚШ-та тұтқындалуы және түрмеде өткізген уақыты туралы тәжірибесімен бөлісіп, ұлтаралық диалог саласындағы қазіргі қиындықтарға тоқталды.
Ресейлік саясаткер әрі қоғам қайраткері Мария Бутина
© Sputnik/Стрингер
Айта кетері, "Sputnik Pro на Зубовском" – дәрістер курсы ғана емес, тәжірибе алмасуға және жаңа кәсіби байланыстар орнатуға арналған алаң.
"Біз қазірдің өзінде чат аштық. Енді араласуды жалғастырып, тәжірибе алмасып, сұрақтар қойып, бір-бірімізге көмектесе аламыз", – деді Оңтүстік Осетиядан келген қатысушы Олег Плиев.
Оның әріптесі Донна Дудаева да алдағы уақытта байланыста болып, кәсіби мәселелер бойынша тәжірибе алмасуға үмітті екенін айтты.
"Sputnik Pro на Зубовском" – ТМД елдерінің журналистеріне арналған жоба
© Sputnik/Стрингер
Модуль кезінде қатысушыларға мәдени бағдарламамен танысуға да уақыт бөлінді. Олардың кейбірі жобаға қатысу арқылы Мәскеуге алғаш рет келген.
"Ұйымдастыру деңгейін ерекше атап өткім келеді. Бізге қамқорлық көрсетіліп жатқаны сезіледі. Мысалы, Мәскеудегі негізгі мәдени орындарға қалай жетуге болатыны көрсетілген карта берілді. Бұл өте пайдалы. Мен Мәскеуге алғаш рет келіп отырмын, Қызыл алаң мен Ескі Арбатты көріп үлгердім", – деді өзбекстандық қатысушы Ситора Примова.
"Sputnik Pro на Зубовском" – ТМД елдерінің журналистеріне арналған, жақын шетелдер мен Балтық елдеріндегі мультимедиа орталықтары дирекциясы жүзеге асыратын жоба. Бағдарлама 2023 жылдан бері өткізіліп келеді. Осы уақыт аралығында 16 модуль ұйымдастырылып, оған жақын шетелдегі 11 елден 192 адам қатысты.
