Тоқаев Ербол Хамитовті III дәрежелі "Барыс" орденімен марапаттады
12:29 26.03.2026 (жаңартылды: 12:43 26.03.2026)
© Photo : Пресс-служба президента Казахстана
Жазылу
Ақордада чемпион мен оның бапкерлерін марапаттау рәсімі өтті
АСТАНА, 26 наурыз – Sputnik. Мемлекет басшысы ХІV қысқы Паралимпиада ойындарының чемпионы Ербол Хамитовті марапаттады.
Ақордада ХІV Қысқы Паралимпиада ойындарының чемпионы Ербол Хамитов пен оның бапкерлерін марапаттау рәсімі өтті.
Тоқаев ХІV қысқы Паралимпиада ойындарының чемпионы Ербол Хамитовті марапаттады
© Photo : Пресс-служба президента Казахстана
Қасым-Жомарт Тоқаев Италияда өткен әлемдік дода еліміз үшін өте табысты болғанына тоқталды.
"Нағыз чемпион атанып, еліміздің мерейін үстем етті, көк Туымызды биікте желбіретті. Бұл – қазақ параспорты үшін тарихи жетістік. Ербол қазақтың қайсар, өр рухты әрі намысты ұлт екенін күллі әлемге паш етті. Сондықтан, ең алдымен, саған және бапкерлерге шынайы ризашылығымды білдіремін", - деді Тоқаев.
Президенттің айтуынша, Паралимпиада ойындарына аттанар сәтте елдің көк Туы чемпионның қолына табысталып, оған артылған сенім толығымен ақталған.
"Соның арқасында еліміз командалық есепте 18-ші орынға табан тіреді. Үздіктердің ішінен алға шығып, чемпион болу оңай емес. Бұл – жылдар бойғы тынымсыз дайындық пен қажырлы әрі табанды еңбектің жемісі екені анық", – деді президент.
Мемлекет басшысы Ербол Хамитовті III дәрежелі "Барыс" орденімен марапаттады.
Тоқаев ХІV қысқы Паралимпиада ойындарының чемпионы Ербол Хамитовті марапаттады
© Photo : Пресс-служба президента Казахстана
Туризм және спорт министрлігіне қарасты дене мүмкіндіктері шектеулі тұлғаларға арналған спорттық даярлау орталығының жаттықтырушылары Василий Коломиец пен Антон Ждановичке "Парасат" ордені, Солтүстік Қазақстан облысындағы "Үміт" мүмкіндіктері шектеулі тұлғаларға арналған спорт клубының жаттықтырушысы Аслан Тоқбаевқа "Құрмет" ордені табысталды.
Ақордада ХІV Қысқы Паралимпиада ойындарының чемпионы Ербол Хамитов пен оның бапкерлерін марапаттау рәсімі өтті
© Photo : Пресс-служба президента Казахстана
Ербол Хамитов әлемдік додаға аттанар алдында мемлекеттік Туды тапсырып, сенім артқаны үшін президентке алғыс айтты.
"Осы Паралимпиада ойындары мен үшін үлкен жауапкершілік болды. Сіздің қолдауыңызбен жеңіске жеттік. Бұған мамандардың және бапкерлердің сіңірген еңбегі зор. Сіздің қолдауыңыз әр спортшыға күш-қуат береді. Біз мұнымен тоқтамаймыз", – деді Паралимпиада чемпионы.
