Ресей Қазақстанмен энергетика саласында жаңа жобалардың әлеуетін көріп отыр - Мишустин
14:55 24.07.2025 (жаңартылды: 14:57 24.07.2025)
© Photo : Пресс-служба правительства Казахстана
Жазылу
Қазақстан мен Ресей үкімет басшылары Алтайда кездесті
АСТАНА, 24 шілде-Sputnik. Алтайда ТМД мемлекеттері үкімет басшыларының қатысуымен халықаралық экологиялық конференция басталды.
Манжерок курортында Ресей мен Қазақстан премьер-министрлерінің жеке кездесуі өтті.
Қазақстан мен Ресей үкімет басшылары Алтайда кездесті
© Photo : Пресс-служба правительства Казахстана
Кездесу барысында тараптар стратегиялық әріптестік пен одақтастыққа негізделген Қазақстан мен Ресей арасындағы сенім мен сындарлы диалогтың жоғары деңгейін атап өтті.
"Мемлекет басшыларының тапсырмасы бойынша біз өзара сауда көлемін 30 млрд АҚШ долларына дейін ұлғайту бойынша мақсатты жұмыс жүргізіп жатырмыз. Инвестициялық ынтымақтастықта зор мүмкіндіктер бар. Жалпы, екіжақты өзара іс-қимыл мәселелерінің кең ауқымын шешуде ынтымақтастық жөніндегі үкіметаралық комиссияның тиімді қызметін атап өткім келеді", – деді Олжас Бектенов.
Қазақстан мен Ресей үкімет басшылары Алтайда кездесті
© Photo : Пресс-служба правительства Казахстана
Михаил Мишустин өз кезегінде Олжас Бектеновке Ресей Қазақстанның жетекші сыртқы сауда серіктестерінің қатарына кіретінін айтты.
"Біз ресейлік және қазақстандық кәсіпорындар бір - бірінің нарығына шығып, бірлескен кәсіпорындар құрып, инвестициялар, технологиялар алмасуы үшін оңтайлы инвестициялық, іскерлік ахуалды қамтамасыз етеміз", - деді Мишустин.
Екі мемлекет арасындағы әріптестікті тереңдету аясында осы жылдың күзінде Орал қаласында өтетін Қазақстан мен Ресейдің XXI Өңіраралық ынтымақтастық форумының дайындық барысына ерекше назар аударылды.
Кездесу қорытындысы бойынша тараптар барлық басым бағыттар бойынша екі ел арасындағы өзара тиімді экономикалық ынтымақтастықты одан әрі тереңдетуге дайын екендіктерін жеткізді.
