Астанада ағаштарға QR код ілінеді
14:46 21.04.2025 (жаңартылды: 14:52 21.04.2025)
© Sputnik / Стрингер
Жазылу
Мемлекет басшысына елорданы көгалдандыру және абаттандыру жоспары таныстырылды
АСТАНА, 21 сәуір – Sputnik. Астанада ағаштарды құжаттандыру және цифрландыру арқылы есепке алу шаралары қолға алынады, сондай ақ QR код енгізіледі.
Бұл туралы қала әкімі Жеңіс Қасымбек президентке айтты.
Қала тұрғындары QR кодтың көмегімен ағаш туралы ақпарат алып, оған қатысты мәселе туындаса тиісті органдарға хабарлау мүмкіндігіне ие болады.
Сондай-ақ әкім биыл Астана қаласында 1 миллионнан астам түп жасыл желек егу жоспарланғанын айтты. Сонымен қатар 180-нен аса қоғамдық кеңістік пен ауланы абаттандыру көзделіп отырғанын жеткізді.
"Аталған жұмыстар шаһардың тарихи көшелерінде, Президент саябағында, Үкімет үйінің айналасында, Есіл өзенінің жағалауында, "Мыңжылдық" аллеясында, Триатлон паркінде, Greenline бульварында, Желілік саябақта, вокзал маңы мен Иллюзия паркінде, Сығанақ, Ш.Қалдаяқов, Гете, Біржан сал және басқа да көшелердің бойында жүргізіледі", - делінген Ақорда хабарламасында.
Сондай-ақ Ақбұлақ өзенінің арнасын тазалау жалғасады. Келесі айда "Қазақстан" спорт кешенін жаңғырту жұмыстары басталады.
