Қазақстанның ірі әуежайларында маймыл шешегіне қарсы жаттығулар өтті
Жазылу
Денсаулық сақтау министрлігінің санитарлық-эпидемиологиялық қызметі әуе порттарының дайындығын тексерді
АСТАНА, 21 тамыз — Sputnik. Қазақстанның ірі әуежайларында маймыл шешегіне қарсы жаттығулар өтті. Оларды денсаулық сақтау министрлігінің санитарлық-эпидемиологиялық қызметі ұйымдастырды.
Қазақстанның ірі әуежайларында маймыл шешегіне қарсы жаттығулар өтті
Астана мен Алматы халықаралық әуежайларының қоғамдық денсаулық сақтау саласындағы төтенше жағдайларға дайындығы тексерілді.
"Оқу-жаттығулар барлық негізгі қызметтің: санитарлық-эпидемиологиялық, шекаралық, кедендік, сондай-ақ әуежай қызметтерінің, полицияның желілік бөлімінің, әуежайдың медициналық пунктінің, жедел медициналық жәрдемнің және медициналық ұйымдардың өзара іс-қимылын пысықтауға бағытталған. Жұқпалы ауруларға күдікті жолаушылар анықталған кезде қандай іс-қимылдар жасау керектігіне ерекше назар аударылды", - деп хабарлады денсаулық сақтау министрлігі.
Қызметкерлер жолаушының белгілерін анықтаудан бастап оны ауруханаға жатқызуға және қажетті эпидемияға қарсы және дезинфекциялық шараларды жүргізуге дейінгі іс-шаралардың толық циклінен өтті.
Қазақстанның ірі әуежайларында маймыл шешегіне қарсы жаттығулар өтті
"Оқу-жаттығу кезіндегі барлық қызмет іс-қимылдардың дайындығы мен үйлесімділігінің жоғары дәрежесін көрсетті, бұл олардың ықтимал қауіп-қатерлерге жауап беруге дайын екендігін көрсетті", - деді ведомство.
Қорытынды ретінде семинар-кеңес өткізіліп, онда әр қызметтің іс-әрекеттері талқыланып, ведомствоаралық өзара іс-қимылды күшейту жөнінде ұсыныстар берілді.
