"ИННОПРОМ" көрмесі аясында бірқатар құжатқа қол қойылды
18:23 10.07.2024 (жаңартылды: 18:27 10.07.2024)
© Photo : Үкіметтің баспасөз қызметі
Жазылу
Өнеркәсіп көрмесіне қазақстандық делегацияны Роман Скляр басқарып барды
АСТАНА, 10 шілде – Sputnik. "ИННОПРОМ" XIV халықаралық өнеркәсіп көрмесі аясында өзара тиімді ынтымақтастық бойынша бірқатар құжатқа қол қойылды, деп хабарлады үкіметтің баспасөз қызметі.
"ИННОПРОМ" XIV халықаралық өнеркәсіп көрмесі
© Photo : Үкіметтің баспасөз қызметі
Мәселен, Қарағанды облысы әкімдігі мен бизнес өкілдерінің қатысуымен бірлескен жобалар құру, оның ішінде автономды электрмен қоректендіру батареяларын жобалау және өндіру, кәсіпорындарды техникалық қайта жарақтандыру бойынша келісімдер жасалды.
"Сонымен қатар Қазақстанның өнеркәсіп және құрылыс министрі РФ өнеркәсіп және сауда, БАӘ сыртқы сауда министрлерімен, РФ Свердлов облысының губернаторымен, Башқұртстанның премьер-министрімен және ірі өнеркәсіптік кәсіпорындардың ("УралКран" ЖШҚ, "Еуразиялық механикалық зауыт" ЖШС, "СГМК-Металл" ЖШҚ) бірінші басшыларымен кездесулер өткізді", - деп жазылған хабарламада.
Қазақстан делегациясы ЕАЭО және ТМД өнеркәсіптік саясат жөніндегі кеңестердің кезекті отырыстарына да қатысты, оның аясында ЕАЭО шеңберінде өнеркәсіпті дамытудың 2030 жылға дейінгі негізгі векторлары қамтылған орта мерзімді стратегиялық құжат қаралды.
Айта кетері, "ИННОПРОМ" XIV Халықаралық өнеркәсіп көрмесі Екатеринбург қаласында 2024 жылдың 8-10 шілде аралығында өтті. Іс-шараға ЕАЭО, БАӘ, Сербия, Куба, Әзербайжан, Түрікменстан, Оман, Үндістан, Тайланд, Пәкістан Түркия, Венгрия және басқа да мемлекеттердің ресми делегациялары қатысты.
"ИННОПРОМ" XIV халықаралық өнеркәсіп көрмесі
© Photo : Үкіметтің баспасөз қызметі
Қазақстан делегациясын премьер-министрдің бірінші орынбасары Роман Скляр басқарды. Оның құрамына орталық органдардың, өңірлердің, бизнес пен ұлттық компаниялардың өкілдері кірді.
Көрмеде ірі отандық металлургия және машина жасау компаниялары: Қазақмыс корпорациясы, Қарағанды құю-машина жасау зауыты (KLMZ), Railways Systems KZ, Alageum Electric және ВодЭкоФильтр таныстырылды.
