Негізгі ҰБТ-ға өтініш қабылдау қашан басталады
© Sputnik / Владислав Воднев
Жазылу
Төтенше жағдай режимі жарияланған 6 өңірде тіркелу уақыты ұзартылады
АСТАНА, 30 сәуір – Sputnik. Негізгі ҰБТ-ға өтініш 6-14 мамыр аралығында қабылданады. Тестілеудің өзі 16 мамырда басталып, 5 шілдеге дейін жалғасады, деп хабарлады Ұлттық тестілеу орталығы.
Дегенмен төтенше жағдай режимі жарияланған 6 өңірде (Ақмола, Ақтөбе, Атырау, Батыс Қазақстан, Қостанай, Солтүстік Қазақстан облыстары) тіркелу уақыты ұзартылады (6-20 мамыр аралығында), ҰБТ 25 мамыр мен 12 шілде аралығында өткізіледі.
"Ғылым және жоғары білім министрлігінің шешімі бойынша 2024 жылы талапкерлер негізгі ҰБТ-ны екі рет тапсырып, ең үздік нәтижемен грант конкурсына қатыса алады", - деп жазылған хабарламада.
ҰБТ-ға қатысу үшін Ұлттық тестілеу орталығының app.testcenter.kz сайты немесе UTO қосымшасы арқылы тіркелуге болады.
Талапкерлер тестілеу күнін, уақытын және пунктін өздері таңдайды. Бұл ретте олар екі мүмкіндік үшін бейіндік пәндердің бір ғана комбинациясын белгілейді.
Талапкерлердің негізгі ҰБТ-ға дайындығын жақсарту мақсатында осыған дейін әр пән бойынша жеке тақырыптық талдау енгізілді. Яғни, әр ҰБТ-дан кейін (қаңтар, наурыз) түлектерге жеке тақырыптар бойынша білімдерін арттыру ұсынылады. Сонымен қатар бірінші мүмкіндікті тапсырғаннан кейін олар екінші мүмкіндікке дейін дайындықтарын жақсарта алады. Одан бөлек, онлайн байқау сынақтары іске қосылған.
Тестілеу форматында өзгерістер жоқ. 2024 жылғы талапкерлер үш міндетті және таңдау бойынша екі пәннен тест тапсырады.
"Оқу сауаттылығы" мен "Математикалық сауаттылық" міндетті пәндерінен тапсырмалар саны 5 сұраққа қысқарды. Бұл бейіндік пәндер бойынша сұрақтар санын 40-қа дейін арттыруға мүмкіндік берді. Сонымен қатар бейіндік пәндерде берілген тізімнен сәйкестікті анықтауға арналған 5 тапсырма қосылды.
Осылайша, ҰБТ тапсырмалар саны өзгеріссіз қалады, жалпы 120 сұрақ. Оның ішінде:
"Қазақстан тарихынан" 20 тапсырма,
"Оқу сауаттылығынан" 10 тапсырма,
"Математикалық сауаттылықтан" 10 тапсырма,
екі бейіндік пәннен 40 тапсырма.
Жоғары балл – 140, ол да өзгеріссіз қалды.
Тестілеудің жалпы уақыты – 4 сағат (240 минут). Сонымен қатар ерекше білім беру қажеттіліктері бар балаларға қосымша 40 минут уақыты сақталады.
Тест тапсырушылар тестілеу аяқталғаннан кейін 30 минут ішінде апелляцияға өтініш бере алады. Сертификат аппеляциялық комиссияның шешімінен кейін талапкердің жеке кабинетінде қолжетімді болады.
Шекті балл өзгерген жоқ:
"Құқық" және "Педагогикалық ғылымдар" білім беру салалары үшін кемінде 75 балл,
"Денсаулық сақтау және әлеуметтік қамтамасыз ету (медицина)" кемінде 70 балл,
"Ауыл шаруашылығы және биоресурстар", "Ветеринария" кемінде 60 балл (ұлттық ЖОО үшін);
ұлттық жоғары оқу орындарына түсу үшін кемінде 65 балл,
басқа жоғары оқу орындарына кемінде 50 балл жинау керек.
2024 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбаларына талдау жүргізіледі. Тыйым салынған заттарды пайдалану немесе ережелерді бұзу фактілері анықталған жағдайда түсушінің ҰБТ нәтижелері жойылады.
