Синоптиктер мамырда қай өңірде қуаңшылық болуы ықтимал екенін болжады
© Photo : СС0 / klimkin
Жазылу
АСТАНА, 22 сәуір – Sputnik. Қазгидромет мамырда бірқатар өңірде қуаңшылық болуы ықтимал екенін мәлімдеді. Бұл туралы “Қазгидромет” РМК баспасөз хатшысы Алина Ысмағұлова айтты.
"Жалпы, 2024 жылдың мамырында негізгі егін шаруашылығы өңірлерінде ылғал көбінесе нормаға жуық және жоғары болады деп күтіледі. Қызылорда облысының Қармақшы ауданында атмосфералық қуаңшылық күтілуде, мұнда жауын-шашын тапшылығы мен ауа температурасының жоғарылауы болжанады. Мамырда Қостанай облысының Қарасу ауданында, Батыс Қазақстан облысының Бурлин, Сырым және Қаратөбе аудандарында, Павлодар облысының Ертіс және Успенка аудандарында және Павлодар қаласында өте ылғалды болады деп күтіледі", - деді ол орталық коммуникациялар қызметіндегі брифингте.
Оның атап өтуінше, елдің қалған аумағында ылғалдану жағдайы нормаға жуық болмақ. Болжам www.agrodata.kz қосымшасында және "Қазгидромет" РМК ресми сайтында жарияланды. Қажет болған жағдайда алдын ала болжам нақтыланады.
