Министрлік еліміздің су қоймаларындағы жағдай туралы айтты
© Sputnik / Стрингер
Жазылу
Қазақстан мен Ресей су тасқыны және гидротехникалық нысандардың жұмысы туралы жедел ақпарат алмасып отыр
АСТАНА, 7 сәуір – Sputnik. Су қоймаларындағы қазіргі су ағыны 1980 жылдан бергі ең ірісі, деп хабарлайды су ресурстары және ирригация министрлігі.
Жалпы алғанда, елдің су қоймаларындағы жағдай мынадай:
Ақмола облысындағы екі ірі су қоймасы орта есеппен 99%-ға толды, екі нысан да транзиттік режимде жұмыс істеп жатыр.
Ақтөбе облысындағы екі ірі су қоймасының су жинау көрсеткіші орта есеппен 95%-ды құрайды. Нысандар штаттық режимде жұмыс істеуде, су ағынының азаюы байқалады.
Шығыс Қазақстан облысындағы бес ірі су қоймасының орташа су жинау көрсеткіші – 62%, олардың барлығы штаттық кестеге сай жұмыс істеп жатыр.
Батыс Қазақстан облысында 4 ірі су қоймасы орта есеппен 59%-ға толғанжәне штаттық режимде жұмыс істеуде.
Қарағанды облысының төрт ірі су қоймасы бойынша су жинау көрсеткіші – 98%. Өңірде су тасқыны кезеңі өтті.
Қостанай облысындағы екі ірі су қоймасы орта есеппен 95%-ға толды. Аймақта су тасқыны байқалады.
Солтүстік Қазақстан облысының екі ірі су қоймасы 100% толды.
"Су объектілерінде жедел іс-шаралар қабылдау үшін тәулік бойы кезекшілік ұйымдастырылып, су шаруашылығы жағдайына үздіксіз мониторинг жүргізіліп жатыр. Министрліктің 1000-нан астам маманы мен 280 техникасы жұмылдырылды", - делінген хабарламада.
Сондай-ақ, Қазақстан мен Ресей су тасқыны және гидротехникалық нысандардың жұмысы туралы жедел ақпарат алмасып отырғаны хабарланды.
Су ресурстары және ирригация министрі Нұржан Нұржігітов Ресей су ресурстары федералды агенттігінің басшысы Дмитрий Кирилловпен телефон арқылы тұрақты байланыста. Тараптар гидротехникалық нысандардың апатсыз жұмысын қамтамасыз ету үшін екі елдің шекаралас аймақтарындағы су тасқыны жағдайын жіті бақылауда ұстап отыр.
