Тоқаев әйелдер қауымын 8 наурыз мерекесімен құттықтады
09:27 08.03.2024 (жаңартылды: 12:32 08.03.2024)
© Photo : Пресс-служба президента Казахстана
Жазылу
АСТАНА, 8 наурыз - Sputnik. Мемлекет басшысы Қасым-Жомарт Тоқаев қыз-келіншектерді Халықаралық әйелдер күнімен құттықтады. Бұл туралы Ақорданың баспасөз қызметі жазды.
"Сұлулық пен үйлесімді айшықтайтын шуақты көктем мерекесінде біз барша асыл жандарға ерекше құрмет көрсетіп, ықылас-ілтипат білдіреміз. Сіздер түрлі салада жемісті еңбек етіп, елімізді өркендетуге белсенді атсалысып келесіздер. Кез келген шаруаға жауапкершілікпен қарап, әрбір істің берекесін арттыруға ұйытқы болып жүрсіздер. Ардақты аналар бүкіл саналы ғұмырын баласының болашағына арнап, өскелең ұрпаққа тәлім-тәрбие беріп отыр. Осы мәртебелі миссиясын кәсіби қызметімен және қоғамға пайдалы жұмыстармен бірге атқарып жүрген арулар да аз емес. Әйелдерге жан-жақты жағдай жасау, олардың құқығын қорғау және отбасы институтын нығайту – мемлекеттік саясаттың негізгі басымдығы", - деді президент.
Сондай-ақ мемлекет басшысы еліміздің қыз-келіншектері жасампаздық қасиетімен қоғамның құндылықтар жүйесін жаңартуға және Әділетті Қазақстанды құруға өлшеусіз үлес қоса береді деп сенетінін білдірді.
