Президент Батыс елдері жариялаған санкциялардың сақталуына қатысты пікір білдірді
16:36 20.06.2023 (жаңартылды: 16:42 20.06.2023)
© Photo : Пресс-служба президента Казахстана
Жазылу
АСТАНА, 20 маусым – Sputnik. Президент Қасым-Жомарт Тоқаев Батыс елдері жариялаған санкциялардың сақталуына қатысты пікір білдірді.
"Біз, ең алдымен, ДСҰ ережелері мен нормаларын басшылыққа аламыз. Сондай-ақ халықаралық нарықта қабылданған барлық ережені сақтаймыз. Ал екі мақсатта қолданылатын тауарлардың Ресейге экспорты туралы айтар болсақ, бұл мүлдем шындыққа жанаспайды. Өйткені, жаңа ғана айтқанымдай, біз ДСҰ ережесін және Еуропалық Одақ жариялаған барлық санкция талаптарын сақтаймыз.Әйтсе де, Ресеймен сауда-саттық жасаймыз. Былтыр екі ел арасындағы тауар айналымының көлемі 28 миллиард долларға жетті. Бұл қолданыстағы халықаралық стандарттарға толық сай келеді", - деді президент.
Сонымен қатар президент Қасым-Жомарт ЕуроОдақтың Орталық Азия елдерімен белсенді ынтымақтастығын атап өтті.
"Еуропалық Одақ – Қазақстан үшін аса маңызды әрі еліміздің ең ірі сауда серіктесі. Біз өзара ынтымақтастығымызды нығайту үшін еуропалық институттармен тұрақты жұмыс істейміз. Қазақстан – "Орталық Азия + ЕО" форматының белсенді серіктесі.Осы форматтағы соңғы кездесуіміз Қырғызстанда өтті. Жуырда өзара ынтымақтастығымызға, сондай-ақ геосаяси жағдайға қатысты өзекті мәселелерді талқыладық. Орталық Азия халықаралық аренада ықпалды аймаққа айналып келеді", - деді мемлекет басшысы.
