Хиджабсыз ирандық әйел, бүйрегі жоқ бала және Арал қасіреті – жеңімпаз суреттер

Даниялық фотограф Мадс Ниссен түсірген "Ауғанстандағы бейбітшілік бағасы" атты фото. Суретте 15 жастағы Халил Ахмад бейнеленген. Оның ата-анасы аштан өлмеу және отбасын асырау үшін баласының бүйрегін 3 500 долларға сатып жіберген. Ауғанстанда адам органының заңсыз саудасы күшейіп жатыр.

Бұл суретте Тегерандағы алаңда хиджабсыз бойжеткен бейнеленген. Мұсылман елінде әйел адамдарға хаджаб кию міндетті болып саналады. "Махса қайтыс болғаннан кейін бірнеше күн өткен соң, мен Кешаварзи бульварының жанынан өтіп бара жатқанымда "Әйел, өмір, бостандық" деп ұрандаған ерлер мен әйелдердің, жастар мен қариялардың үлкен тобын көрдім", - деді сурет авторы Ахмад Халабисаз. 2022 жылдың 16 қыркүйегінде Иран үкіметінің Діни имандылық полициясының бақылаушы патрулі мемлекеттік стандартқа сай хиджаб кимегені үшін 22 жастағы Махса Аминиді тұтқындаған. Бойжеткен Тегерандағы ауруханада күдікті жағдайда қайтыс болды.

Суретте Венесуэланың Каракас қаласында президент Мадуроны қызметінен босату туралы референдумға наразылық акциясы кезінде полиция тұтқындаған ер адам бейнеленген. Авторы – Фабиола Ферреро.

Суретте Мьянма әскерилерімен қақтығыстан кейін көз жұмған жолдастарының мәйітін иығына салған Халықтық қорғаныс күштерінің қарсыласу жауынгерлері шегініп бара жатыр.

Армян фотографы Ануш Бабаджанянның "Шайқалған сулар" картинасы Арал теңізінің қасіретін баяндайды. Суреттің сипаттамасында көрсетілгендей, бір кезде Арал теңізі орналасқан аумақта, Акеспе атты балықшылар ауылының маңында ыстық қайнар пайда болған. Мұнда адамдар ыстық бұлақтан ем қабылдау үшін жиі келеді. Соңғы жылдары Арал теңізі өз суының 90 процентін жоғалтты. Қазақстан мен Өзбекстан шекарасындағы Орталық Азиядағы бұрынғы тұзды көл 1960 жылдары Сырдария мен Әмудария өзендерін мақта өнеркәсібі үшін бұру жобасын жүзеге асыру кезінде тартыла бастады.

Суретте жұмысшылар Перудегі Плайя Каверодағы мұнай өңдеу зауытында мұнай төгілуінен туындаған экологиялық апаттың салдарын жойып жатыр. Авторы – Мусук Нольте.

Алессандро Чинквенің "Альпакерос" атты суреті. Перудің Анд тауларында альпакаларға қауіп төніп отыр. Өйткені табиғи жайылымдар тарылып, мұздықтар еріп жатыр. Жануарлар еркін жайыла алмай әрі су табуы қиындап барады. Фермерлер жоғары биіктікке қарай қоныс аударуға немесе қалыпты өмір сүру салтынан бас тартуға мәжбүр. Суретте жазғы жайлауға бара жатқан жолда жергілікті фермердің қызы альпака баласын құшағына алып тұр.

Фотограф Майя Левин түсірген "Ширин Әбу Аклені жерлеу кезінде" атты сурет, Associated Press. Белгілі палестиналық-америкалық "Әл-Жазира" журналисі Ширин Әбу Акленің табытын алып бара жатқан кезде Израиль полициясының аза тұтушылармен қақтығысы. Тілші 25 жылдан астам уақыт бойы Таяу Шығыстағы қақтығысты жазып келген және оны Израильдің Дженин қаласындағы рейд кезінде атып өлтірген.

Омарташылар Альфредо, Убалдо және Хосе Аризона шөліндегі Венден маңындағы ара ұяларын тазалап жатыр, АҚШ. Суретті Йонас Како түсірген, Германия. Жауын-шашынның болмауы және өзен ағысының жоғары жағында суға деген сұраныстың артуына байланысты Колорадо өзені арнасының айтарлықтай қысқаруы себепті жұмысшылар араларды науалардағы сумен қамтамасыз етіп жатыр. Ыстық пен құрғақшылық араларды әлсіретіп, оларды ауру қоздырғыштар мен паразиттер алдында әлсіз етеді және бұл аралар қоректенетін өсімдіктерге тікелей әсер етеді. 2019 және 2020 жылдар аралығында АҚШ-та дақылдардың тозаңдануы үшін маңызы бар аралар колонияларының саны 43,7 процентке азайды. Байқаудың қазылар алқасы бұл сурет жаһандық деңгейде резонанс тудыратын экологиялық мәселеге назар аударуға түрткі болады деп есептеді.

"Марияның саяхаты", сурет авторы – Карлос Барриа, Reuters. 2017 жылы пана сұрап Гондурастан АҚШ-қа келген кезде Мария Эрнандес пен оның 8 және 3 жастағы екі қызы ұсталды. Шекарашылар Марияны депортациялады, бірақ оның балалары қалып қойды. Алдымен олар балалар үйінде тұрып, кейінірек Марияның АҚШ-та тұратын ересек ұлының қолына барды. 2022 жылы Мария пана ұсыну бағдарламасы бойынша оралып, Лос-Анджелесте отбасымен қайта қосылды.

Кимберли Дела Круз түсірген "Ұлт өлімі" атты сурет. Мануэль Евангелиста, Эдмар Веларде, Пауло Туборо, Дженнифер Дискаргар және Каталино Альгелесті бетперде киген адамдар өлтіргеннен кейін 2016 жылдың 1 қарашасында Филиппиннің Мандалуйонг қаласында көршілер қылмыс орнын қарап жатыр. Евангелистаның қызы ол әкесі және оның достарымен бірге үйде болған кезде бетперде киген адамдар басып кіріп, оны үйден кетуге мәжбүрлеп, содан кейін оқ жаудырғанын айтты. Филиппин президенті Родриго Дутерте 2016 жылдың маусымында қызметіне кіріскеннен кейін көп ұзамай "есірткіге қарсы келісілген соғыс" бастап, күдіктілерге шабуыл жасауға бірнеше рет бұйрық берген. Бұл полиция ғана емес, сонымен қатар бетперде киген қарулы адамдар мен басқа да бейбіт тұрғындар қару қолданып, өз беттерінше "халық сотын" жүргізуге әкелді. Фотограф "есірткіге қарсы соғысты" басталған күннен бастап түсіріп келген. Байқаудың қазылар алқасы бұл соғыстың жергілікті отбасыларға тигізген әсерін сурет арқылы жеткізу қабілетін жоғары бағалады.

Мэдс Ниссен түсірген тағы бір сурет "Ауғанстандағы бейбітшілік бағасы" деп аталады. Әйелдер мен балалар Кабул қаласының орталығындағы наубайхананың алдында қайыр сұрап отыр. 2021 жылдың тамызында Талибан билікке келгенге дейін мұнда бірнеше әйел ғана қайыр сұрап отыратын. Қазір олардың саны айтарлықтай ұлғайған. Себебі уақыт өткен сайын адамдардың шарасыздығы күшейіп жатыр.

Чад Аджамиан түсірген "Австралиялық су тасқынының инфрақызыл келбеті" атты сурет. Бұл Сидней аумағын қоршап тұрған негізгі су жолы Хоксбери өзенінің бойындағы су тасқынын бейнелейді. Су тасқынының деңгейі орташа есеппен 13 метрден асып, рекордтық көрсеткішке жетті.

Кристофер Рогель Бланке түсірген "Мінсіз у" атты сурет, Мексика. Ер адам Вилла Герреро гүл базарында өз көлігіне тиелген гүлдерді сатып тұр. Бұл базарда елдің басқа аймақтарына және шетелге жөнелту үшін күн сайын тонналаған гүл сатылады. Осы фотожоба Мексиканың Вилья-Герреро аймағындағы гүл өнеркәсібінде агрохимиялық заттарды шектеусіз пайдалану мәселесін айшықтайды.

Мохамед Махди түсірген "Мен үшін мұнда жабық есік жоқ" атты сурет. Бұл веб-жоба теңіз деңгейінің көтерілуі Аль-Макстың жергілікті тұрғындарына, яғни Мысырдағы Александрияда орналасқан Махмудия арнасының бойындағы балықшылар ауылына әсерін сипаттайды. Бұл ауыл тұрғындары сан ғасыр бойы Жерорта теңізіне апаратын арна бойын мекендеп, тіршілік еткен. 2020 жылы Мысыр үкіметі Аль-Макстың кей аумағындағы халықты арнадан бірнеше шақырым жердегі тұрғын үйлерге қоныс аударуға мәжбүрлеп, арна бойындағы үйлерді қиратып қана қоймай, осы әрекеті арқылы бұл аймаққа тән ұжымдық естеліктер мен жергілікті мәдениетке қауіп төндірді. Махди жобасы жойылу алдында тұрған қауымдық өмір салтының элегиясы саналады.