Рамазан айы кезінде ауызашар қалай өтеді – әлем елдерінде түсірілген суреттер

Рамазан – айлардың сұлтаны. Исламның бес шартының үшіншісі – Рамазан айында ораза ұстау. Суретте: Волонтер Каирде таратылған азық-түлік мөлшерін тексеріп жатыр, Мысыр.

Сүннет бойынша ауызды құрмамен немесе сумен ашады. Мұхаммед Пайғамбар былай деп айтқан: "Егер де біреулерің ауыз ашатын болсаңдар, құрмамен ашыңдар, ал егер құрма табылмаса, сумен ашыңдар, шын мәнінде ол тазартады". Суретте: Мароккода Рамазан айында жұмысшылар ауызашарға арнап тағам салынған қораптарды дайындап жатыр.

Ауыз ашуға, яғни тамақтануға күн батқаннан кейін ғана рұқсат етіледі. Суретте: даяшы Түркиядағы жер сілкінісі кезінде зардап шеккендерге арналған алғашқы ауызашар алдында дастархан жайып жатыр.

Рамазан айында мүміндер күндізгі уақытта ішіп-жеуден бас тартады. Суретте: Үндістанның Нью-Дели қаласындағы Джама Масджидте ер адамдар қасиетті Рамазан айының бірінші күні тамақтанып отыр.

Рамазан – әрбір мұсылман үшін қасиетті ай. Суретте: ер адам Ливияның шығысындағы Бенгази қаласында жаңа піскен тандыр нанын дайындап жатыр.

Бұл айда мұсылмандар төзімділік пен мейірімділікті сақтауға, мұқтаж жандарға көмектесуге тырысуы керек. Суретте: Газада Рамазан айында ыстық тамақ алуға кезекке тұрған балалар.

Бұл айда уақытты мешітте өткізу, күні бойына созылған оразадан кейін үлкен дастархан басына жиналу әдетке айналған. Суретте: қайырымдылық ұйымының волонтерлері Рамазан айында Бейруттың оңтүстік шетіндегі шейіттер аймағында таң алдында сәресіге арналған тағамды таратып жатыр.

Бұл тамақтан бас тарту ғана емес, адам өз ойы мен іс-әрекетін тазартатын, кішіпейілділік пен тақуалықты, өзара көмек пен қолдау көрсетуге бейімделетін уақыт. Суретте: Пәкістанның Равалпинди қаласындағы мешітте еріктілер мұсылмандардың қасиетті Рамазан айы кезінде адамдарға таратуға арналған тағамдарды дайындап жатыр.

Ауыз ашатын уақыт ақшам намазының уақытында белгіленеді. Сондай-ақ мұсылмандар таңертең күн шұғыласы білінгенге дейін ауыз бекітіп үлгеру керек. Суретте: Ер адамдар Джакартада Рамазан айында тамақтанатын уақытты күтіп отыр.

Ауыз ашатын уақытта әрбір мұсылман шамадан тыс тамақтанудан тартынуы керек. Сәресі кезінде де жеңіл тамақтанған абзал. Суретте: Таиландтың оңтүстігіндегі Наратхиват провинциясындағы мұсылмандар қасиетті Рамазан айында ораза тұтар алдында базардан азық-түлік сатып алып жатыр.