Жамбыл облысында жоғалған 2 жасар бала мешіттен табылды

© Photo : pixabay.comИллюстративті фото
Иллюстративті фото - Sputnik Қазақстан, 1920, 16.01.2023
Жазылу
АСТАНА, 16 қаңтар – Sputnik. Жамбыл облысының Қаратау қаласында жоғалған 2 жасар бала мешіттен аман-есен табылды, деп хабарлады Жамбыл облыстық полиция департаменті.
Ведомствоның мәліметінше, 2023 жылдың 15 қаңтарында Қаратау қаласының полициясына 2 жасар баланың үйінен жоғалып кеткені туралы хабарлама келіп түскен. Баланың анасы оны әжесімен бірге қалдырып, дүкенге кеткенін, ал қайтып келгенде оны үйінен таппағанын айтқан.
Осы дерекке қатысты Қазақстан Қылмыстық кодексінің 125-бабы 2-бөлігі 5-тармағымен (Адам ұрлау) сотқа дейінгі тергеу басталды.
Жамбыл облысы полиция департаментінің басшылығы жедел түрде іздестіру іс-шараларын жүргізуге Қаратау қаласына барды.
"Хабарлама түскен сәттен біз баланы іздеуге кiрiстiк. Iздестiру шараларына 80 полиция қызметкері, 50-ден астам ерікті және ауданның қамқор тұрғындары жұмылдырылды. Біз қаланың әр бұрышын аралап, барлық жертөле мен үйлердің шатырын қарадық. Ең басты тiлегiмiз баланы тірі және сау табу болды", - деді Талас АПБ ЖПҚб кәмелетке толмағандар жөніндегі учаскелік инспекторы полиция капитаны Жанғали Көпжасаров.
Жедел іздестіру іс-шараларының нәтижесінде бала мешіттен табылып, Талас ауданының орталық аудандық ауруханасына жеткізілді. Медициналық тексеру барысында баладан ешқандай жарақат анықталған жоқ.
Баланың анасы үйде болмаған кезде әжесінің таныстары пәтерге келіп, алкоголь ішкенi белгілі болды. Баланың қатты жылағанын естіген пәтер қонақтарының бірі қатты мас күйінде оны көрпеге орап, жақын маңдағы мешітке апарған.
Қазіргі уақытта болған оқиғаның мән-жайын анықтау үшін қажетті тергеу амалдары жүргізіліп жатыр.
Жаңалықтар
0