Әлеуметтік осал топтардың құқығын қорғайтын омбудсмен институты пайда болады
© Fotolia / Peter Atkins
Жазылу
АСТАНА, 16 қаңтар – Sputnik. Қазақстан президенті жанынан Халықтың әлеуметтік жағынан осал санаттарының құқықтары жөніндегі уәкіл институты құрылуы мүмкін. Тиісті құжат "Ашық НҚА" порталында жарияланды, деп хабарлайды Sputnik Қазақстан.
Қаулыда Уәкіл институты өз қызметін қоғамдық бастамада жүзеге асыратыны айтылған.
Уәкілдің негізгі мақсаттары – халықтың әлеуметтік жағынан осал санаттарының құқықтары мен заңды мүдделерінің кепілдіктерін қамтамасыз ету, сондай-ақ мемлекеттік және қоғамдық институттарымен өзара іс-қимылда олардың құқықтары мен бостандықтарын қалпына келтіру.
Омбудсмен мына адамдардың негізгі құқықтары мен заңды мүдделерін қорғайды:
Ұлы Отан соғысының ардагерлері;
жеңілдіктері бойынша Ұлы Отан соғысының ардагерлеріне теңестірілген ардагерлер;
басқа мемлекеттердің аумағындағы ұрыс қимылдарының ардагерлері;
мүгедектігі бар адамдар;
мүгедектігі бар балалары бар немесе оларды тәрбиелеп отырған отбасылар;
атаулы әлеуметтік көмек алушылар;
асыраушысынан айырылу бойынша жәрдемақы алушылар;
жасына қарай зейнет демалысына шыққан зейнеткерлер;
қандастар;
"Алтын алқа", "Күміс алқа" алқаларымен наградталған немесе бұрын "Батыр ана" атағын алған, сондай-ақ I және II дәрежелі "Ана даңқы" ордендерімен наградталған көпбалалы аналар, көпбалалы отбасылар жатады.
Құжат 27 қаңтарға дейін қоғам талқысына шығарылды.
