Биыл қандастар мен қоныс аударушыларға бөлінетін квота мөлшері артты
10:19 10.01.2023 (жаңартылды: 10:26 10.01.2023)
© Sputnik / Абзал КалиевАқша, теңге
![Ақша, теңге Ақша, теңге - Sputnik Қазақстан, 1920, 10.01.2023](https://sputnik.kz/img/07e4/0c/0a/15702203_0:0:3000:1688_1920x0_80_0_0_074edb7585c188b6b9db8a2b73724610.jpg)
© Sputnik / Абзал Калиев
Жазылу
АЛМАТЫ, 10 қаңтар - Sputnik. Қоныс аударушылар мен қандастарға 8600-ден астам квота бөлінді, деп хабарлайды еңбек және халықты әлеуметтік қорғау министрлігі.
Былтырғымен салыстырғанда квота саны 566-ға көп.
2023 жылғы квота келесідей бөлінді:
қандастар үшін Солтүстік Қазақстан облысы бойынша – 138 адам, Қостанай облысы бойынша – 150, Абай облысы бойынша – 196, Шығыс Қазақстан облысы бойынша – 239, Ақмола облысы бойынша – 270, Павлодар облысы бойынша – 932 адам;
қоныс аударушылар үшін: Қарағанды облысы бойынша – 33 адам, Ұлытау облысы бойынша – 120, Абай облысы бойынша – 238, Шығыс Қазақстан облысы бойынша – 305, Қостанай облысы бойынша – 530, Солтүстік Қазақстан облысы бойынша – 2 660, Павлодар облысы бойынша – 2 841 адам.
Қандастар мен қоныс аударушыларды қолдау үшін қосымша субсидия түрінде көмек беріледі:
көшуге – отбасының әрбір мүшесіне 70 АЕК (241,5 мың теңге) көлемінде біржолғы төлем;
бір отбасына 12 ай ішінде тұрғын үйді жалдау (жалға алу) және коммуналдық қызметтерге ақы ретінде 15-тен 30 АЕК-ке дейін (51,7-ден 103,5 мың теңгеге дейін) төленеді.
Еске сала кетсек, 1991 жылдан бастап 2023 жылдың 1 қаңтарына дейін 1 миллион 107 мың этникалық қазақ тарихи отанға оралды.
Былтыр 19 178 этникалық қазақ қандас мәртебесін алды.