Жамбыл облысының кәсіпкерлері елордаға 500 тоннаға жуық азық-түлік әкеледі
© Photo : Елорда әкімдігінің ресми сайты
Жазылу
НҰР-СҰЛТАН, 2 қыркүйек – Sputnik. Нұр-Сұлтан қаласында 3-4 қыркүйекте өтетін ауыл шаруашылығы жәрмеңкесіне Жамбыл облысы өз өнімдерін ұсынады, деп хабарлады елорда әкімдігінің ресми сайты.
Бұл өңірдің 100-ге жуық кәсіпкері елордаға 495,8 тонна өнімін әкелмек. Олар: 47 тонна ет (жылқы, сиыр, қой еті), 15 тонна тауық еті, 14 тонна шұжық өнімдері, 38,8 тонна сүт өнімдері, 6 мың дана жұмыртқа, 10 тонна кондитерлік өнімдер, 13,4 тонна макарон өнімдері, 10 тонна балық, 6 тонна бал, 5,5 тонна мақсары майы, 336,1 тоннадан астам көкөніс, бақша дақылдары мен жеміс-жидек өнімдері. Сонымен қатар келісі 480 теңгеден сатылып жатқан 10 тонна қант ұсынылады.
Бұл жәрмеңке облыстың ауыл шаруашылығы тауарын өндірушілеріне өз өнімдерін делдалсыз тікелей өткізуге мүмкіндік береді, нәтижесінде ауыл шаруашылығы өнімдерінің бағасы нарықтағы бағадан 10-20 пайызға төмен болады.
Айта кетері, жәрмеңкелер 13 қарашаға дейін әр сенбі және жексенбі күндері өтеді. Өтетін орны: "Астана-Арена" стадионының жанындағы алаң, Тұран 48.
Ал 10-11 қыркүйек күндері өтетін жәрмеңкеге Қызылорда облысының кәсіпкерлері өз өнімдерін әкеледі.
