Алматыда орталық мешітте күн сайын 500 адамға ауызашар беріліп жатыр – фото
13:06 09.04.2022 (жаңартылды: 09:54 09.08.2023)
© Sputnik / Айгерім Таубай
Жазылу
АЛМАТЫ, 9 сәуір – Sputnik. Рамазан айы басталғалы Алматының орталық мешітінде күн сайын жүздеген адамға дастархан жайылып жатыр. Ораза айында жайылған дастарханнан дәм татуға жиналған жамағаттың арасында қариялар мен жастар, студенттер мен балалар, тіпті шетелдіктер де бар. Sputnik Қазақстан тілшісі "Рамазан шатырындағы" дайындық пен ауызашардың қалай өтетінін көріп қайтты.
Бұған дейін қаланың бас имамы Төлеби Оспан Алматы орталық мешітінде "Рамазан шатыры" құрылып, күнделікті 500 кісіге ауызашар дастарханы жайылатынын айтты. Сондай-ақ қала мешіттерінде де ауызашар беріледі.
"Рамазан шатырында" дастархан жаюға дайындық кешкі бес жарым шамасында басталады. Мешіт маңына қала тұрғындары да кешкі сағат алтыдан бастап жиналады.
Алматылықтар орталық мешіт маңында жиналып жатыр
© Sputnik / Айгерім Таубай
Халық жиналып жатқан уақытта "Рамазан шатырының" маңына су себіліп, қызметкерлер қызу жұмыс істейді.
"Рамазан шатыры" маңында қонақтарды қарсы алуға дайындық жүріп жатыр
© Sputnik / Айгерім Таубай
Ал ауызашар дастарханында Алматы орталық мешітінің бес қызметкері мен он шақты ерікті қыз қызмет етіп жүр. Олардың арасында мешітте құран үйрену курсына қатысып жүрген қыздар да бар.
Ауызашар дастарханы жайылып жатыр
© Sputnik / Айгерім Таубай
Алматы орталық мешітінің наиб имамы Қасым Әшімовтің айтуынша, бұл шара Ораза айында жыл сайын өтеді.
"Рамазан шатыры" – Алматы қаласы орталық мешітінің жыл сайын Рамазан айында ұйымдастырып жүрген, дәстүрге айналған шарасы. Бұл шатырдың астында бір мезетте 500-ге жуық адам ауыз ашады. Бұл жерде ас-судан бөлек, білікті ұстаздар уағыз айтады. Имамдар келген жамағатқа сұрақтар қойып, діни біліміне қатысты ойындар ұйымдастырады. Арасында спорттық сайыстар да өтеді. Мақал-мәтел жарысы да бар. Соның бәрі шатырдың астындағы 40 минутта өтеді", - дейді Қасым Әшімов.
Мешіт қызметкерлері мен еріктілер дастархан жайып жатыр. Олардың арасында мешіттегі ұстаздардан сабақ алып жүрген бойжеткендер де бар
© Sputnik / Айгерім Таубай
Мешіттің наиб имамы Қасым Әшімовтің айтуынша, бұл дастархан демеушілер есебінен жайылады.
"Хадисте "Ораза ұстаған адамның аузын аштырса, сол ораза ұстаған адамның сауабындай сауап алады" делінген. Соған сүйене отырып, сауапқа асыққан адамдар ниет етеді. Арасында мешіт ауласынан өтіп бара жатып қызығатын кісілер де бар. Кей кезде бір кісі екі не үш күн қатарынан дастархан жаяды, кейде 3-4 кісі бірігіп ауызашар береді", - дейді ол.
Шатырдың ішінде Рамазан айына байланысты 24 хадис ілінген
© Sputnik / Айгерім Таубай
Ауызашар уақыты жақындаған кезде қыз-келіншектер дастарханға ыстық дәмді қоюға асығады. Күні бойы ниет етіп ораза ұстаған азаматтар да шатыр маңына жақындайды.
Жалпы алғанда жиырмаға жуық адам дастархан жаяды. Қыздар бір қатарға тұрып, палауды дастарханға қойып жатыр
© Sputnik / Айгерім Таубай
Алдымен дастарханға қариялар жайғасады. Қыз-келіншектер олардан бөлек шеттегі үстелге отырады.
Қариялар ауызашар дастарханына жайғасып жатыр
© Sputnik / Айгерім Таубай
Жиналған қауым ас ішіп болған соң бірден дастарханнан тұрып кетпейді. Үлкендер мен балаларға бөлек-бөлек сұрақтар қойылып, сыйлықтар беріледі.
Ауызашардан кейін мұнда гір тасын көтеруден сайыс өтеді. Фотода дастархан жайып жүрген мешіт қызметкері
© Sputnik / Айгерім Таубай
Құптан намазының уақыты кіргенше ұлттық аспаптарда музыка шырқалады.
Ауызашарға келген алматылықтар ән тыңдап отыр
© Sputnik / Айгерім Таубай
Айта кетері, биыл рамазан айы 2 сәуірде басталып, 1 мамырда аяқталады. Ал 2 мамыр – Ораза айт күні. Осы жылы ораза 30 күнге созылады.
Жиналғандар бірден тарап кетпейді, олар ауызашардан кейін "Рамазан шатыры" маңында жүр
© Sputnik / Айгерім Таубай
27 сәуірден 28 сәуірге қараған түн – қасиетті Қадір түні. Пітір садақа мөлшері 500 теңге болып белгіленді.
