Әлем

Жаңа Зеландияда 2013 жылдан кейін туғандарға темекі шегуге тыйым салынады

© Sputnik / Виталий Белоусов / Медиабанкке өтуКурение в общественных местах. Архивное фото
Курение в общественных местах. Архивное фото - Sputnik Қазақстан, 1920, 19.12.2021
Жазылу
Жаңа Зеландия "темекі шекпейтін ұрпақты" қалыптастыруға кірісті. 2073 жылға қарай 60 жасқа толған адам да темекі ала алмайды
НҰР-СҰЛТАН, 19 желтоқсан – Sputnik.  Жаңа Зеландияда 2013 жылдан кейін туған азаматтарға темекі шегуге тыйым салынады, деп хабарлады "National Geographic Россия" порталы.
Қазіргі кезде Жаңа Зеландияда 15 жастан асқан адамдардың 11,6 проценті темекі шегеді. Ал жергілікті маори халқының арасында шылым шегетіндердің саны 29 процентке жеткен. Арнайы заңның аясында біртіндеп темекіден толығымен бас тарту жоспарланып отыр. Осы құжат келесі жылы маусым айында парламентке енгізіліп, жыл соңында қабылданады.
Оқи отырыңыз: Вейптің қаупі неде?
Темекі шегуге қарсы іс-шаралар кезең-кезеңмен іске асырылады. 2024 жылдан бастап темекі сататын дүкендерді барынша азайту жоспарланған. Қазіргі 8 000 сауда орнының 500-і ғана қалады. 2025 жылқа қарай сатылатын темекіде никотин аз болады. Ал 2027 жылы темекіні мүлдем шекпейтін ұрпақты қалыптастыру жұмысы басталады. Сол кезде 14 жасқа келген, яғни 2013 жылы және одан кейін туған адамдарға темекі сатуға тыйым салынады. Себебі адам көп жағдайда жас кезінде темекіге әуес болып, артынан оған толығымен тәуелді болып қалады. Мәселен, Жаңа Зеландияда бес адамның төртеуі 18 жаста, ал қалғандарының бәрі 25 жасқа қарай темекі шеге бастайды. 
"Біз жастардың темекі шегуді ешқашан бастамайтынына  көз жеткізуіміз керек. Сол себепті болашақ ұрпаққа темекі сатуды қылмыс деп жариялаймыз", - дейді денсаулық сақтау министрінің орынбасары Айеша Верралл.
Заң бойынша қатаң шектеу өмір бойы сақталады. Бұл дегеніміз, 2073 жылға қарай 60 жасқа толған адам да темекі ала алмайды. Ал одан бір жас үлкен тұрғындар бұл шектеуге ілінбейді. Бірақ ондай адамдар да уақыт өте келе азаяды. Осылайша Жаңа Зеландия "темекі шекпейтін ұрпақты" қалыптастыра алады.
Ресми мәліметке сәйкес, бүгінде осы елде жыл сайын 5 000 адам темекіден қайтыс болып жатады.
Жаңалықтар
0