Мамин Уфада Қазақстан-Башқұртстан іскерлік форумына қатысты
13:03 19.12.2021 (жаңартылды: 13:05 01.02.2022)
© пресс-служба премьер-министра Казахстана
Жазылу
Тараптар Қазақстан-Ресей стратегиялық серіктестігін одан әрі тереңдету тұрғысынан өзара іс-қимылдың қазіргі жай-күйі мен перспективаларын талқылады
НҰР-СҰЛТАН, 19 желтоқсан – Sputnik. Уфа қаласында Қазақстан премьер-министрі Асқар Мамин Башқұртстан басшысы Радий Хабировпен келіссөз жүргізіп, Қазақстан-Башқұртстан іскерлік форумына қатысты.
Үкімет басшысы Қазақстанның Башқұртстанмен сауда-экономика, инвестиция, көлік-логистика, энергетика, АӨК, өнеркәсіптік кооперация және басқа да салалардағы ынтымақтастығын арттыру үшін елеулі әлеуеттің бар екенін атап өтті, деп атап өтті Қазақстан премьер-министрінің ресми сайты.
Осы жылдың 10 айының қорытындысы бойынша Қазақстан мен РФ арасындағы сауда көлемі 30%-ға артып, $19,5 миллиардқа жетті. Бұл ретте сауда құрылымын әртараптандыруда ілгерілеушілік байқалады — Қазақстанның экспорт көлемі 39,4%-ға, оның ішінде өңделген өнім көлемі 47,7%-ға өсті.
Биылғы қаңтар-қазан айларында Қазақстан мен Башқұртстан арасындағы тауар айналымының көлемі өткен жылдың сәйкес кезеңімен салыстырғанда 32,1%-ға өсіп, 305 миллион доллар болды. Бұл көрсеткіш пандемияға дейінгі деңгейден 10,3%-ға жоғары. Алдағы жылдары тараптар тауар айналымын $1 миллиардқа дейін жеткізуге ниетті.
Мамин мен Хабиров Уфа қаласында өтіп жатқан "Халықаралық бизнес апталығы-2021" аясында "Қазақстан – Башқұртстан" іскерлік форумына қатысты. Форумда 100-ге жуық адам — мемлекеттік органдардың, өңірлердің басшылары, сондай-ақ екі республиканың іскер топтарының өкілдері бас қосты.
"Башқұртстан Республикасы Қазақстан мен Ресейдің стратегиялық серіктестігінде ерекше орын алады. Биылғы қыркүйек айының соңында Радий Хабировтың ҚР-ға сапарының қорытындысы бойынша бекітілген Қазақстан мен Башқұртстан арасындағы екіжақты ынтымақтастықты дамыту жөніндегі 2022-2024 жылдарға арналған Жол картасы сауда-экономикалық және инвестициялық өзара іс-қимылды арттырудың сенімді тетігіне, сондай-ақ бизнес-топтар үшін бірқатар перспективалы салаларда қалыптасатын мүмкіндіктердің тереңдігі мен ұзақ мерзімділігінің белгісіне айналуда", — деді Мамин форумда сөйлеген сөзінде.
Форум аясында химия және тоқыма өнеркәсібі, машина жасау, АӨК, сондай-ақ мұнай-газ саласындағы консалтингтік қызметтер салаларында 8 инвестициялық және коммерциялық келісімшартқа қол қойылды. Аса маңызды құжаттардың бірі "Каустик" АҚ мен "Башқұрт сода компаниясы" АҚ арасында бірлескен кәсіпорын құру туралы қол қойылған келісім болды.
Қазақстан мен Ресей аумағында жалпы көлемі $1 миллиардқа дейінгі жобалар іске асырылады. Каустикалық сода, натрий гипохлориті, хлор, тұз қышқылы, титан қостотығы және басқа да химиялық өнімдер өндірісі қамтамасыз етіледі. Сонымен қатар ТМД-дағы жалғыз цирконий оксихлоридінің өндірісі жолға қойылады.
Оқи отырыңыз: Тоқаев Башқұртстан басшысы Радий Хабировты қабылдады
Үкімет басшысы Уфа қаласына сапары барысында Салават Юлаевтың ескерткішіне гүл шоқтарын қойып, Башқұртстанның жобалық басқару және әлеуметтік мониторинг тәжірибесімен танысты, сондай-ақ телекөпір режимінде Башқұртстан Республикасының жоғары оқу орындарында білім алып жүрген қазақстандық студенттермен әңгімелесті.
Жұмыс сапарына сауда және интеграция министрі Бақыт Сұлтанов, энергетика министрі Мағзұм Мырзағалиев, экология, геология және табиғи ресурстар министрі Серікқали Брекешев, Ақтөбе облысының әкімі Оңдасын Оразалин, Батыс Қазақстан облысының әкімі Ғали Есқалиев, іскер топтар өкілдері қатысты.
