НҰР-СҰЛТАН, 23 қазан – Sputnik. Рязаньда "Эластик" оқ-дәрі шығаратын зауытта болған жарылыс бейнебақылау камерасына түсіп қалды. Төтенше жағдай он жеті адамның өмірін қиды, деп хабарлайды РИА Новости.
Кадрдан арнайы киімдегі жұмысшылардың қаптарды кезекпен конвейерлік желіден алып жатқаны көрінеді. Бір кезде бір нәрсе жарқ етіп, бірден өрт басталады. Зәресі ұшқан жұмысшылар қаптарын тастай алып, қаша жөнеледі. Бейнежазба осы сәтте үзіледі – жарылыс болады.
Шиловский ауданы Лесной кентінде орналасқан "Эластик" зауытынан 22 қазан таңертең өрт шықты. Оқ-дәрі цехында жарылыс болған. Төтенше жағдайдан 17 адам қаза тапты, жарылыс кезінде аман қалған жалғыз адам ауруханада көз жұмды.
ТЖМ өртке технологиялық процестің бұзылуы себеп болғанын мәлімдеді. Тергеу комитеті бір және одан көп адамның өліміне әкеп соққан, өнеркәсіптік қауіпсіздік талаптарын бұзу туралы қылмыстық іс қозғады.
Оқи отырыңыз:
