НҰР-СҰЛТАН, 22 қыркүйек – Sputnik. Ұлттық аударма бюросының атқарушы директоры Рауан Кенжеханұлы "Қазақ тіліндегі 100 жаңа оқулық" жобасына жұмсалған қаржының көлемін жариялады, деп хабарлайды Sputnik Қазақстан тілшісі.
"Әрбір кітапқа, шамамен, 3 860 теңге жұмсалды. Соның ішінде авторлық құқық, аударма, баспа мен тарату шығындары бар. Жоба аясында 100 жаңа оқулық шығарылды. Әрбіреуінің таралымы – 10 000 дана. Барлық оқулықтың жалпы таралымы 1 миллион дана. Мұны 3 860 теңгеге көбейтсек, 3,8 миллиард теңге шығады. Қаражат бюджеттен бөлінді", - деді Кенжеханұлы орталық коммуникациялар қызметінде өткен онлайн брифингте.
Оның айтуынша, кітаптың бәрі Қазақстанда басылды. Ал шетелдік авторларға олардың еңбегін аударып басқаны үшін ақы төленді.
"Бұл – интеллектуалдық меншік. Автор ақы мөлшерін өзі айтты. Әрбір оқулық бойынша бөлек-бөлек келіссөз жүргізілді", - деп атап көрсетті Кенжеханұлы.
Айта кетері, "Жаңа гуманитарлық білім. Қазақ тіліндегі 100 жаңа оқулық" жобасы "Рухани жаңғыру" бағдарламасы негізгі бағытының бірі болып саналады. Оған "Ұлттық аударма бюросы" қоғамдық қоры жауапты. Әлемге танымал оқулықтарды аудару жұмысына 300-ден аса маман тартылды.
Оқи отырыңыз:
- Абай, Ыбырай, Міржақыпты танитын 2 жасар балақайдың анасы: қолынан кітап түспейді
- Павлодар облысында әкім бір жылда 125 кітап оқыған балаға ешкі сыйлады
- Ауыл тұрғыны қабірден бір жарым ғасыр бұрын жарық көрген кітап тауып алды
