НҰР-СҰЛТАН, 16 қыркүйек – Sputnik. Мемлекет басшысы Қасым-Жомарт Тоқаев Пәкістан премьер-министрі Имран Ханмен кездесті, деп хабарлады Ақорда.
Пәкістан премьер-министрімен кездесу барысында Қасым-Жомарт Тоқаев өзара сенім мен сыйластыққа негізделген екіжақты қатынастардың деңгейі жоғары екенін атап өтті.
Мемлекет басшысы ортақ мүддені көздейтін салалардағы көлік-логистикалық байланыстарды нығайту үшін жаңа мүмкіндіктерді қарастыруға шақырды. Қазақстан президенті сауда-экономикалық, ғылыми-технологиялық және мәдени ынтымақтастықты арттыру мәселесіне арнайы тоқталып, Имран Ханды Қазақстанға сапармен келуге шақырды.
"Ал Пәкістан премьер-министрі екі ел арасындағы сауда-экономикалық ықпалдастықты нығайтуға септігін тигізетін логистикалық мүмкіндіктерді дамыту маңызды екенін айтты, сондай-ақ, Қазақстан президентін Пәкістанға сапармен келуге шақырды", - делінген хабарламада.
Кездесуде олар Ауғанстандағы ахуал мен өңірлік қауіпсіздікті қамтамасыз ету мәселелері жөніндегі ойларымен бөлісті.
Оқи отырыңыз: Ауғанстандағы жағдай азаматтық соғысқа ұласуы мүмкін – Тоқаев
