НҰР-СҰЛТАН, 16 қыркүйек – Sputnik. Қостанайлықтар мессенджерде коронавирусқа қарсы салынған екпеден кейін бір оқушы қайтыс болғаны туралы аудиожазба таратып жатыр. Өңірдің денсаулық сақтау басқармасы бұл ақпаратты жоққа шығарды, деп хабарлайды жергілікті alau.kz порталы.
Мессенджерде тараған аудиожазбада ер адам қаладағы мектептердің бірінде балаларға жасырын коронавирусқа қарсы екпе салынғанын айтады. Соның салдарынан бір оқушы қайтыс болып, бірнешеуінің денсаулығы нашарлапты-мыс.
Алайда облыстың денсаулық сақтау басқармасы мұның жалған екенін мәлімдеді.
"Қазақстанда балаларға коронавирусқа қарсы екпе егілмейді. Қостанайдың 7 мектебінде баланың көз жұмғаны және жағдайлары нашарлағаны туралы ақпарат – жалған. Құқық қорғау органдары бәрін ойдан құрастырып, шындыққа жанаспайтын ақпаратты таратып жүрген адамның жеке басын тез арада анықтайды деп сенеміз", -деді басқарманың баспасөз қызметіндегілер.
Бұл жайтқа Қостанай облысы полиция департаментінің баспасөз қызметі де түсініктеме берді.
"Қазір полиция мектепте балаларға екпе егілгені туралы жалған ақпарат таратқан ер адамды іздестіріп жатыр. Бұл фактіге қатысты Қылмыстық кодекстің 274-бабы "Көрінеу жалған ақпарат тарату" бойынша сотқа дейінгі тергеу басталды", - деді ведомство.
Бұл бапта бір мың айлық есептік көрсеткішке дейін айыппұл салу не сол мөлшерде түзеу жұмыстарына не төрт жүз сағатқа дейін қоғамдық жұмыстарға тарту не бір жылға дейін бас бостандығын шектеуге не сол мерзімге бас бостандығынан айыру жазасы көзделген.
Тағы оқыңыз: "Балаларға екпе салынады": оқушылардың тізімін жасатқан басшы жазаланды
Балалар, егде жастағылар мен жүкті әйелдер қандай вакцина салуға тиіс
Коронавирус пен тұмауға қарсы вакцинаны бірге алуға бола ма - Бекшиннің жауабы
