АЛМАТЫ, 24 тамыз – Sputnik. Ауғанстанды 12 адамнан тұратын кеңес басқарады. Оны Талибан* басшылары құрғалы жатыр.
Кеңеске Талибан саяси кеңсесінің басшысы Абдул Ғани Барадар, қозғалыстың негізін қалаушы Мұхаммед Омардың ұлы – Мұхаммед Якуб, сондай-ақ "Хаккани желісі" террористік тобының жоғары лауазымды мүшесі Халиль әл-Рахман Хаккани кіреді, деп хабарлады Foreign Policy ақпарат көздеріне сілтеме жасап.
Барадар мен Якубқа жақын дереккөздің хабарлауынша, олар 20 жыл бұрын террористер өлтірген "Солтүстік альянстың" жетекшісі Ахмад Шах Масудтың ұлы Ахмад Масудты кеңеске қосқысы келетінін айтты. Басылым Панджшерде (Ауғанстан провинциясы – Sputnik ) тәлібтерге қарсы тұрған Масудтың кеңес құрамына қосылуы екіталай деп санайды.
Бұған дейін басшылықта болған әкімшіліктің кей мүшесіне министрліктерде қызмет ұсынылады.
*Талибан – Қазақстанда және басқа бірқатар елде тыйым салынған террористік ұйым.
