"Десантшылар взводы" және "Тактикашыл мерген" конкурстарының қазақстандық қатысушылары жарысқа дайындығын аяқтап жатыр.
Қазақстанның қорғаныс министрлігі Youtube-каналында халықаралық армия ойындары қатысушыларының Рязан облысының полигондарындағы жаттығуы түсірілген видео жариялады.
"Десантшылар взводы" конкурсының қазақстандық командасы қарудан атып, жауынгерлік машиналардың құралдарын тексерді. Механик-жүргізушілер кедергілер қойылған трассада БМД-2 көлігін жүргізіп көрді. Конкурстың төрт кезеңінің үшеуінде қатысушылар десанттық жауынгерлік машинада жарысады.
Бұдан бөлек "Тактикашыл мерген" конкурсына дайындық аясындағы соңғы жаттығулар өтті. Әскерилер жеке, жұп және топ құрамында машығын жетілдірді.
