НҰР-СҰЛТАН, 20 тамыз – Sputnik. Қазақстанның премьер-министрі Асқар Мамин Еуразиялық үкіметаралық кеңес отырысында азық-түлік бағасы мәселесін көтерді.
"Маңызды сын-қатерлердің бірі ретінде азық-түлік тауарлары бағасының өсімін атап өтуге болады. Бүгінгі күні азық-түлік тауарларының әлемдік индексі соңғы он жылдағы рекордтық көрсеткішке жетті. ФАО (Біріккен ұлттар ұйымының Азық-түлік және ауыл шаруашылығы ұйымы) мәліметінше, маусым айындағы баға индексі өткен жылдың көрсеткішінен 31 процентке жоғары болған", - деп атап өтті Мамин Қырғызстанда өткен кеңесте.
Оның айтуынша, барлық тауар түрінің өсімі байқалады. Оның ішінде – бидай, сүт өнімдері, ет, қант бар.
Азық-түлік бағасының өсіміне әлемдік нарықтағы тұрақты трендтер, сол сияқты тұтынушылық сұраныстың қалпына келуі, өндірістегі кідірістер, қолайсыз ауа-райы мен климаттағы өзгерістерден туындаған жаһандық агроөнеркәсіптік кешендегі өндірістік құбылулар әсер етті.
"Біздің елдердегі инфляция құрылымында азық-түлік тауарлары бағасының үлесі басым болғандықтан, бұл жағдай Еуразиялық экономикалық одақтың тұрақтылығы мен азаматтарымыздың әл-ауқатына қауіп төндіреді. Мұндай динамика азық-түлік нарығында тұрақтылықты қамтамасыз ету үшін шұғыл шаралар қабылдауымызды талап етеді. Сонымен қатар қазіргі баға конъюнктурасы нарықтың маңызды қатысушысы ретінде бізге үлкен мүмкіндіктер қалыптастырады", - деді премьер-министр.
Оқи отырыңыз: Мамин ЕАЭО елдерін вакцинация паспортын өзара мойындауға шақырды
