АЛМАТЫ, 5 тамыз – Sputnik. Мәскеудің оңтүстік-шығысында ер адам ұлын терезеден лақтырып, қашып кетті. Осы оқиғадан кейін адам өлтіруге ұмтылу әрекеті бойынша қылмыстық іс қозғалды, деп хабарлады РИА Новостиге Мәскеудің тергеу комитеті басшысының аға көмекшісі Юлия Иванова.
Бұған дейін Мәскеу прокуратурасы үш жасар бала ауруханаға ауыр халде түскеннен кейін тексеруді бастағанын хабарлады. Ведомствоның алдын ала мәліметі бойынша, әкесі ұлын бесінші қабаттағы пәтердің терезесінен лақтырып, өзі қашып кеткен.
Ресей Федерациясының Қылмыстық кодексінің жас баланы өлтіруге оқталу бабы бойынша қылмыстық іс қозғалды.
Тергеу мәліметі бойынша 4 тамызда кешке Шумилов көшесіндегі үйдің жанынан жарақат алған жас бала табылды. Қазір баланың жағдайы ауыр.
"Алдын ала мәлімет бойынша пәтерде баламен бірге әкесі болған. Оның қазір қайда екені анықталып жатыр", - деді Иванова.
Іс Мәскеу прокуратурасында ерекше бақылауға алынды.
