НҰР-СҰЛТАН, 24 шілде – Sputnik. Қазақстан құрамасы Токиодағы Олимпиада ойындарының ашылу салтанатында жанкүйерлерді тамсандырды. Қамшыбек Қоңқабаевпен бірге еліміздің туын көтеріп шыққан Ольга Рыпакованың киім үлгісін көпшілік жылы қабылдады.
Олимпиаданың ресми түрде ашылуына бірнеше күн қалғанда Forbes шолушысы команданың формасын ең стильді киім үлгілері қатарына жатқызған болатын, деп жазды Olympic.kz.
Жанкүйерлер мен көрермендер үшін ту ұстайтын спортшыларға арнайы тігілген киім тосынсый болғаны анық.
Қазақстан командасы боксшы Қамшыбек Қоңқабаев пен жеңіл атлет Ольга Рыпакова бастап шықты. Олардың киім үлгілері Ұлттық Олимпиадалық комитеттің тапсырысы бойынша арнайы тігілді. Киім үлгісін дайындау барысына Әбілхан Қастеев атындағы мемлекеттік өнер музейінің мамандары атсалысса, дизайн және киімді тігумен танымал алматылық модельер Виолетта Иванова айналысты.
Әдемі көйлек Ольга Рыпакованың ажарын одан әрі аша түсті. Шетелдік жанкүйерлер де олимпиада чемпионының киім үлгісін жоғары бағалап, мақтау сөздерін жаудырып жатыр.
"Олимпиадашылар костюмінің ішіндегі ең әдемісі. Мен Жапонияданмын. Сіздің командаңызға ойында сәттілік тілеймін".
"Мен Италияданмын. Бұл қыз мен үшін ең әдемі ту ұстаушы".
"Ол керемет. Атын білсе бола ма?".
Сондай-ақ, жанкүйерлер ҰОК Instagram парақшасының Direct-не тоқтаусыз жазып жатыр.
"Сондай әдемі! Көптеген жапон осылай ойлайды".
#teamkz flag bearers in Tokyo 2020 Opening Ceremony 😍😍😍
— Kazakhstan Olympic Team (@olympic_kz) July 23, 2021
#東京2020 #Tokyo2020 #OlympicGames #Olympics #OpeningCeremony pic.twitter.com/non7vym0YE
Одан бөлек, біздің спортшылар мен ту ұстаушылар олимпиадашылар шеруіне дейін де, кейін де көпшілік назарында болды. Олимпиадалық ауылдағылардың барлығы дерлік біздің Рыпакова және Қоңқабаев сынды спортшыарымызбен суретке түсуге асықты.
