Sputnik Қазақстан денсаулық сақтау министрлігі санитарлық-эпидемиологиялық бақылау комитетінің ресми өкілі Ержан Байтанаевтан мерекеде денсаулыққа қауіп төндірмес үшін қалай сақтану керектігі туралы сұрап білді.
Оның айтуынша, пандемия қоғамда әлі де шектеулер енгізуге мәжбүрлеп отыр. Сондықтан діни мереке құрметіне орай бұқаралық жиындардан бас тартқан абзал.
"Қазіргі уақытта эпидемиологиялық жағдайдың ушығуына байланысты бас мемлекеттік санитарлық дәрігердің қаулысына сәйкес барлық қоғамдық іс-шараларды атап өтуге тыйым салынған. Қазіргі жағдайда азаматтардың қауіпсіздігі мен денсаулығы бірінші орында тұрғанын жақсы түсінуіміз керек. Осыған байланысты тұрғындардан түсіністік танытып, Құрбан айт мерекесін отбасы ортасында атап өтуге, бұқаралық шаралардан бас тартуға және адам көп жиналатын орындарға бармауға шақырамыз", - деді министрлік өкілі.
Құрбан шалуға ниет еткен қазақстандықтар qurban2021.kz сайтына тиісті өтініш жолдай алады. Сонымен қатар құрбандық етті ұсынуға немесе алуға да өтініш қалдыруға болады.
Бетперде тағу, әлеуметтік қашықтықты сақтау және қолды зарарсыздандыру бойынша талаптар әлі де маңызды болып отыр.
