НҰР-СҰЛТАН, 14 маусым — Sputnik. Төтенше жағдайлар департаменті жоғалып кеткен туристердің бірінің мәйітін Түркістан облысының Өгем өзенінен қалай тапқанын хабарлады.
Мәйіт табылған жерге тікұшақ жақын ұшып бара алмаған. Құтқарушылар арқанмен өзен үстінде өткел жасақтап, мәйітті жағаға алып шықты, деп хабарлады Түркістан облысы ТЖД басшысының орынбасары Ерік Сарыбаев.
Санитарлық зембілмен туристің денесін тегіс жерге жеткізіп, 30 метр биіктікте тұрған тікұшақтағылар шығырдың көмегімен туристің мәйітін бортқа көтерген.
ТЖМ хабарламасы бойынша, мәйіті анықталған азамат – 2004 жылы туған жоғалып кеткен турист. Әкесі баласының мәйітін таныды.
Еске сала кетейік, 21 мамырда жеті адам тауға шыққан: Назарбаев университетінің студенттері мен мектеп бітіруші түлек. Туристер 24 мамырда кері қайтуы керек болған. Бірақ ол күні олар байланысқа шықпаған.
Түркістан облысында тауда жоғалған тағы бір студенттің денесі табылды
Сол кезде туристерді іздеу операциясы басталды. Бірнеше күннен кейін жоғалып кеткен үш жас жігіт табылды.
Олар туристердің бірі науқастанып қалуына байланысты екі топқа бөлінгенін айтып берді. Үшеуі сол тұста қалып, қалған төртеуі алға қарай жылжыған. Кейіннен көз жұмған екі туристің мәйіті табылды. Тағы бір туристің денесі 12 маусымда анықталды.
