АЛМАТЫ, 20 мамыр – Sputnik. Ресейлік видеоблогерлер Юлия Гаврилина, Анна Антигрустин және Даня Милохин "Байдың қызын аламын" деген қазақ әніне тик-токта видео түсіріп жатыр.
Олардың видеосы желіде мыңдаған қаралым мен жақсы пікір жинауда.
"Байдың қызын аламын" әнін қазақстандық әнші Алмат Асыланбек орындайды. Ал қазір әуен желі арқылы екінші тыныс алды.
Блогерлер TikTok-та жаңа тренд бастады. Олар "дігідік, дігідік, дігідік, дігідік, дігідік, дігідік шабамын" деп, көңілді билеп видео түсіріп жүр.
Қазақстандық видеоблогерлер Carina Cold және Avdi Senpai жаңа трендті жылы қабылдап, кей видеоға пікір қалдырып жатыр.
Ал желі қолданушылары блогерлер ән мәтінін түсінді ме екен деген сұрақ қоюда.
"Қимылдарына қарасаң, олар әннің мағынасын біледі", – деп жазды кейбір TikTok қолданушылары.
Айта кетейік, бұған дейін TikTok-та қазақстандық өнерпаздардың "Шоқ қыздар" әні хит болған еді.
