Шымкенттік жігіттің ақылға қонбайтын әрекеті видеоға түсіп қалды

НҰР-СҰЛТАН, 9 наурыз — Sputnik. Шымкентте мас жүргізуші полиция қызметкеріне бағынбай, мектеп оқушыларына қауіп төндірді, деп хабарлады Polisia.kz.

5 наурызда Шымкент қаласы полиция департаментінің Қаратау АПБ-ның ювеналды полиция инспекторы № 92 мектептің алдында оқушылардың қауіпсіздігін қамтамасыз ету мақсатында қызмет атқарып тұрған. Сол кезде "Ауди" автокөлігінің жүргізушісі жаяу жүргіншілерге арналған жолақтың алдына автокөлігін қойып, оқушыларға қауіп төндірген.

Мұны байқаған полиция қызметкері жүргізушіге автокөлікті басқа жерге қоюды сұрап, бірнеше рет ескерту жасаған. Алайда жүргізуші тәртіп сақшысының талабына бағынбай, досын көмекке шақырған. Екеулеп тәртіп сақшысына қарсылық білдіріп, балағат сөздер айтып, күш қолданған.

Медициналық сараптаманың қорытындысына сәйкес жүргізуші орта дәрежеде, ал оның досы жеңіл дәрежеде мас болған. Құқық бұзушылар полицияға жеткізілді. Біреуі – 1989 жылы туған, ал екіншісі – 1982 жылы туған Сайрам елді мекенінің тұрғындары.

Полиция қызметкерлері тексеріс нәтижесі бойынша бұл жағдайға құқықтық баға береді.