НҰР-СҰЛТАН, 26 қаңтар — Sputnik. Жасөспірім күндіз үйден шығып кетіп, қайта оралмаған. Ата-анасы келесі күні полицияға хабарласты, деп хабарлады Шығыс Қазақстан облысы полиция департаментінің баспасөз қызметі.
Хабарсыз кеткен баланың әкесі 24 қаңтар күні ағат 22:15 шамасында Риддердегі құқық қорғау органдарына хабарласты. Оның айтуынша, 13 жастағы жасөспірім бір күн бұрын серуендеуге сыртқа шығып, үйге қайта оралмаған.
Ата-анасы мен туыстары баланы өздері іздеп таппақ болды. Жасөспірімнің телефоны сөніп тұрған.
"Риддер полициясының жеке құрамы дабыл бойынша кәмелетке толмаған баланы іздеуге жұмылдырылды", - деп хабарлады полицияда.
Полиция қызметкерлері жасөспірімнің барлық байланысын анықтап, құдықтар мен шатырлы ғимараттарға тексеру жүргізді.
Жоғалған бала 25 қаңтар күні таңертең Риддер қаласындағы Речная көшесіндегі үйлердің бірінен табылды.
"Жасөспірім аман-сау және қазір отбасымен бірге. Кәмелетке толмағандар ісі жөніндегі инспектор баламен және оның ата-анасымен жұмыс жүргізіп жатыр", - деді полиция департаментінде.
Баланың үйден кетуіне не себеп болғаны анықталуда.
