НҰР-СҰЛТАН, 21 қаңтар – Sputnik. Елордада автобуспен жол жүру ақысын төлеу жүйесіне өзгеріс енгізілуі мүмкін, деп хабарлайды Sputnik Қазақстан "City Transportation Systems" компаниясының ресми парақшасына сілтеме жасап.
"SMS төлем сервисін өшіру бойынша тасымалдаушылармен және байланыс операторларымен келіссөздер жүргізілуде. Байланыстың жиі болмауы тасымалдаушыларға үлкен шығын келтіреді және жолаушыларға ыңғайсыздық туғызады. SMS төлемді өшіру туралы шешім қабылданған кезде алдын ала хабарлаймыз", – делінген хабарламада.
Осы орайда компания қазіргі кезде автобуста жолақысын төрт тәсілмен төлеуге болатынын еске салды. Олар:
- көлік картасын валидациялау;
- 2505 қысқа нөміріне SMS жіберу;
- QR-код сканерлеу;
- мобильдік қосымшада көлік кодын енгізу.
SMS төлемді барлық байланыс операторлары арқылы жасауға болады. Ал QR-кодпен SMSBUS, Homebank, OYBY, SENIM, Plus24, My Beeline, Kaspi.kz, Astrabus, My Activ пен Рахмет қосымшалары арқылы төлеуге мүмкіндік бар.
Атаулы жеңілдігі бар көлік картасына Transcard.kz сайтында тапсырыс беруге болады. Оның үйге дейін жеткізу қызметі де бар.
Оқи отырыңыз: Жолақы – 1 теңге: Астанада автобуспен жүру ақысын SMS арқылы төлеуге болады
Ал атаулы емес көлік карталары кез келген RTVM автоматында, кассада және төлем балансын жылдам толықтыру пунктерінде сатылады.
