НҰР-СҰЛТАН, 10 қаңтар – Sputnik. Қазақстан президенті Қасым-Жомарт Тоқаев парламент сайлауына байланысты елде өтуі мүмкін митингілер туралы айтты, деп хабарлайды Sputnik Қазақстан.
"Наразылық көңіл-күй әлемнің бүкіл елінде бар. Полиция заңға сәйкес әрекет етеді. Ешқандай қудалау шаралары қолданылмайды", - деді Тоқаев журналистерге мәжіліс сайлауында дауыс бергеннен кейін.
Оқи отырыңыз: Назарбаев дауыс бергеннен кейін қазақстандықтарға үндеу жолдады
Айта кетсек, мемлекет басшысы Қасым-Жомарт Тоқаев Нұр-Сұлтандағы Оқушылар сарайы ғимаратында орналасқан сайлау учаскесінде дауыс берді.
Мәжіліс сайлауы
Жексенбі, 10 қаңтарда Қазақстанда парламенттің төменгі палатасы – мәжіліске депутаттарды сайлау өтіп жатыр. Дауыс беру елорда уақытымен 07:00-ден 20.00-ге дейін жалғасады.
Парламент сайлауында 11 миллионнан астам қазақстандық дауыс бере алады.
Сағат 10.00-дегі жағдай бойынша сайлаушылардың 11,6 проценті өз таңдауын жасады.
Мәжілістегі орындарға бес партия таласып жатыр:
- Қазақстан халық партиясы;
- Nur Otan партиясы;
- "Ауыл" халықтық-демократиялық партиясы;
- "Ақ жол" демократиялық партиясы;
- "Адал" саяси партиясы.
Орталық сайлау комиссиясы мәжіліс сайлауының соңғы қорытындысын жеті күн ішінде – 2021 жылдың 17 қаңтарына дейін жариялайды.
