Қоғам

2020 жылы қазақстандықтар ең көп көрген видеолар

CC0 / / Пульт в руке от телевизора, иллюстративное фото
Пульт в руке от телевизора, иллюстративное фото - Sputnik Қазақстан
Жазылу
Өткен жылы киносүйер қауым Youtube-те отандық комедияларды көп көрген. Үздік ондықты Нұртас Адамбайдың "Әкім" фильмі бастап тұр

НҰР-СҰЛТАН, 1 қаңтар – Sputnik. Былтыр қазақстандықтар коронавирус пандемиясы салдарынан біраз уақыт карантинде отырды. Шектеу шаралары әлі де жалғасып келеді. Оффлайн байланыс азайып, жұрт онлайн қарым-қатынас жасауға көшті. Интернет желісін пайдалану көлемі артты. Бүгінде сан алуан платформаларда видео көру және музыка тыңдау көрсеткіші айтарлықтай өсті. Sputnik Қазақстан 2020 жылы қазақстандықтар ең көп көрген фильмдер мен клиптерге шолу жасады.

Былтыр елімізде көңіл көтеретін фильмдерге сұраныс жоғары болды. Бұл үрдістің өзіндік себебі бар. Карантинге байланысты халық үйден көп шыға алмады. Адамдар төрт қабырғаға қамалды, жүйкесі жұқарды, күйзеліске түсті. Мамандардың айтуынша, адамдар көңіл-күйін көтеру үшін комедиялық контентті көп іздеген.

2020 жылы Youtube-те отандық комедияларды көп көрген. Үздік ондықты Нұртас Адамбайдың "Әкім" атты фильмі бастап тұр. 

Одан кейін Дархан Сәркеновтың "My love is Aisulu" фильмі мен Әлішер Өтевтің "Ва-Банк" комедиясы келеді.

Төртінші орында "ҚАЙРАТ" атты әзіл сериалының алтыншы бөлімі орналасты. 

"Алдараспан" театрының "Тойдың соңы - 2020" видеосын да көп көрген. Осылайша, әзіл-сықақ ұжымының қойылымы бесінші орынға көтерілді.

Одан кейін "Не тот аялдама" сериалының бірінші бөлімі, "Что было дальше" шоуы, "Тақиясыз періште" сериалы (3-ші маусым, 1-ші серия), "Әпше" фильмінің бірінші бөлімі және "Lovonter" сериалының бірінші бөлімі тұр.

Ал музыкалық клиптер арасында үздік ондықтың алғашқы екі бірдей позициясын "RaiM & Artur" дуэті алып отыр. Бірінші орында – "Ana", екінші орында- "Latte". Осылайша, дуэт үш жыл бойы үздіктердің қатарынан көрініп келеді.

Одан кейінгі орындарда Little Big тобының екі композициясы (Hypnodancer мен Uno – Russia), Dabro ("Юность"),  MIA BOYKA & ЕГОР ШИП ("ПИКАЧУ"), Джаро & Ханза ("Ты мой кайф"), Клава Кока & NILETTO ("Краш"), Асылжан Абдолла ("Жүрек") мен Argonya feat Aikyn ("Сендей ару жоқ") келеді.

Музыкаға арналған Spotify стримингтік сервис те Қазақстандағы 2020 жылдың қорытындысын шығарды. Оған сәйкес, қазақстандық тыңдармандардың талғамы жаһандық трендтермен үндесті. Үздік орындаушылар рейтингісінде жерлесіміз Скриптонит көш бастап тұр.  

Үздік бес орындаушы:

  1. Скриптонит
  2. MORGENSHTERN
  3. The Weeknd
  4. Drake
  5. Travis Scott

Қазақстандықтар K-Pop жанрын да көп тыңдайды.  Мәселен, танымал бес топтың ішінде үш бірдей орынды K-Pop алып отыр. Соның ішінде BLACKPINK мен Stray Kids қыздар тобы бар. Ал бірінші орында – кәрістің BTS тобы. Биыл олар әлемдік феномен атанған болатын. Кәріс әншілерінің ағылшын тіліндегі алғашқы "Dynamite" атты синглы жаһандық рекорд орнатты. Осы шығарма Spotify-ға шыққаннан кейін 24 сағаттың ішінде 12,6 миллион рет тыңдалған.

Үздік бес топ:

  1. BTS
  2. BLACKPINK
  3. Miyagi & Andy Panda
  4. Stray Kids
  5. Rauf & Faik

Ал қазақстандық Иманбек Зейкеновтің (Imanbek) Roses әніне жазған ремиксі Billboard нұсқасы бойынша жылдың үздік би композициясы атанды. Дәл осы композиция  Apple Music-тің үздік ондығына енді. Ал Shazam қосымшасында 22 миллион рет тыңдалды. Бұдан бөлек, АҚШ пен Ұлыбританияда The Weeknd, Dua Lipa, Billie Eillish, Roddy Ricch пен Justin Bieber сияқты орындаушыларды артқа тастап, бірнеше чаттарда көш бастап тұр. Ремикс "Грэмми" сыйлығына ұсынылды.

Жаңалықтар
0