НҰР-СҰЛТАН, 21 желтоқсан – Sputnik. Қарағанды фармацевтикалық зауытында өндірілген 6000 доза мөлшеріндегі "Спутник V" вакцинасының тәжірибелік партиясы Ресейге тексеруге жіберілді. Бұл туралы денсаулық сақтау министрлігінің баспасөз қызметі хабарлады.
"Қарағанды фармацевтикалық зауытында шығарылған алты мың доза мөлшеріндегі "Спутник V" вакцинасының тәжірибелік партиясы Ресей Федерациясына сапасын тексеруге жіберілді. Вакцинаның өнеркәсіптік өндірісі 2021 жылдың қаңтарында басталады деп жоспарлануда", - делінген хабарламада.
Ай сайын кем дегенде 300 мың доза өндіру жоспарланып отыр.
Бұған дейін Қазақстан премьер-Министрі Асқар Мамин Қарағанды фармацевтикалық кешенінде болып, "Спутник V" вакцинасы өндірісін іске қосты.
Кешен базасында екі миллион доза вакцина кезең-кезеңімен шығарылады.
Қазақстанда COVID-19-ға қарсы жаппай вакцинация 2021 жылдың ақпан айында басталады
Қазақстанда өндірілген "Спутник V" вакцинасын жаппай егу 2021 жылдың ақпанында басталады.
Бірінші кезекте медициналық қызметкерлерге, педагогтарға, студенттерге, құқық қорғау органдарының қызметкерлеріне, медициналық-әлеуметтік мекемелер контингентіне, сондай-ақ созылмалы ауруларға шалдыққан тәуекел топтарының өкілдеріне ерікті түрде вакцинация жасалады.
