НҰР-СҰЛТАН, 9 желтоқсан – Sputnik. Мәжіліс Қазақстан үкіметі мен білім, ғылым және мәдениет мәселелері жөніндегі БҰҰ (ЮНЕСКО) арасындағы ЮНЕСКО аясында Мәдениеттерді жақындастыру халықаралық орталығын (2-санат) құру туралы келiсiмді ратификациялау туралы заң жобасын мақұлдады. Орталықты белгілі ақын Олжас Сүлейменов басқарады, деп хабарлайды Sputnik Қазақстан тілшісі.
Келісім "Мәдениеттерді жақындастыру орталығы" мемлекеттік музейі" РМҚК базасында Алматы қаласында ЮНЕСКО-ның қамқорлығымен Мәдениеттерді жақындастыру халықаралық орталығының (2-санат) қызметін қамтамасыз етуді көздейді.
Мәдениет және спорт министрі Ақтоты Райымқұлованың айтуынша, шартты ратификациялау халықаралық деңгейде Қазақстанның беделінің артуына ықпал етеді.
"Орталықты белгілі қазақстандық ақын, жазушы Олжас Омарұлы Сүлейменов басқарады", - деді министр.
Халықаралық шарт ратификацияланғаннан кейін орталық бұл жұмысты Қазақстанның мәдени саясатының басымдықтарына және БҰҰ-ның 2030 жылға дейін тұрақты даму саласындағы күн тәртібіне сәйкес жалғастырады.
Орталық:
- этностардың, мәдениеттер мен діндердің шығу тегі саласындағы іргелі және қолданбалы зерттеулер жүргізуге;
- түрлі өркениеттер мен мәдениеттердің өзара әсер етуінің кешенді процестеріне мүмкіндік беретін Ұлы Жібек жолын зерттеуге;
- мәдениетаралық қоғамдардың қалыптасуы және олардың бірегейлігіне;
- түрлі этностардың мәдениеттерін жақындастыру бойынша форумдар, конференциялар, дөңгелек үстелдер, ашық дәрістер, тренингтер, онлайн-дәрістер өткізуге;
- халықаралық аудитория арасында бейбітшілік пен тұрақты даму мүддесінде мәдениетаралық диалог құндылықтарын таратуға бағытталған халықаралық ынтымақтастыққа арналған бірегей платформа болады.
Бұдан басқа, 2022 жылы Мәдениеттерді жақындастырудың халықаралық онжылдығы бағдарламасының (2013-2022) аяқталуына байланысты Қазақстан атынан "Білім мәдениетінің халықаралық онжылдығы" бағдарламасын жариялау туралы бастама көтерілді.
"Мәдениеттерді жақындастыру орталығына ЮНЕСКО-ның екінші санаты мәртебесін беру еліміздің ұлттық мүдделеріне сәйкес келеді әрі саяси және әлеуметтік тұрғыдан тиімді болады. Бұл өз кезегінде ЮНЕСКО жүйесінде ел бастамаларын іске асыруды тиімді ілгерілетуге ықпал етеді", - деді Райымқұлова.
Ведомство басшысы заң жобасын қабылдау республикалық бюджеттен қосымша қаржылық шығындарға, сондай-ақ теріс әлеуметтік-экономикалық және құқықтық салдарға әкеп соқтырмайтынын атап өтті.
